वर्षौंदेखि जीर्ण अवस्थामा रहेको कलैया–मलाही सडकखण्डको मर्मतसम्भार सुरु भएको छ ।
महागढीमाई नगरपालिकाले आफ्नो क्षेत्रभित्र पर्ने सडकको अत्यन्त जीर्ण भागको मर्मत शुक्रबारदेखि सुरु गरेको हो । नगरपालिकाका अनुसार सडक मर्मतका क्रममा रोड रोलर प्रयोग गरी सडकको सतह सम्याउने तथा ग्राभेल कम्प्याक्ट गर्ने काम भइरहेको छ। कलैया उपमहानगरपालिकाको टेग्रहर पुलदेखि सिर्सिया पुलअन्तर्गत थलहीखोलासम्मको करिब पाँचदेखि छ किलोमिटर सडकमा मर्मतको काम अघि बढाइएको नगरपालिकाले जनाएको छ ।
सडकमा ठाउँ–ठाउँमा खाल्टाखुल्टी परेका कारण सवारी आवागमन तथा स्थानीयको दैनिक आवतजावतमा लामो समयदेखि समस्या हुँदै आएको थियो । कलैया, महागढीमाई, करैयामाई र बारागढी गाउँपालिकालाई जोड्दै कलैयादेखि रौतहटको कटहरियासम्म पुग्ने यो सडक जिल्लाको ग्रामीण तथा दुर्गम क्षेत्रका लागि महत्वपूर्ण मार्ग मानिन्छ ।
स्थानीय उत्पादनलाई बजारसम्म पुर्याउन तथा ग्रामीण बस्तीबाट सदरमुकाम कलैयासम्म आवतजावत गर्न यो सडक मुख्य आधारका रूपमा रहेको स्थानीयको भनाइ छ । लामो समयदेखि सडकको स्तरोन्नति तथा नियमित मर्मतसम्भारमा पर्याप्त ध्यान नपुग्दा सडकको अवस्था थप जर्जर बन्दै गएको स्थानीयको गुनासोपछि नगरपालिकाले मर्मतको काम थालेको हो ।
स्थानीय गणेशप्रसाद कानुले जनप्रतिनिधि पटक–पटक निर्वाचित भए पनि सडक लगायतका आधारभूत पूर्वाधार सुधारमा अपेक्षाकृत काम हुन नसकेको बताउनुभयो । उहाँले जनप्रतिनिधिले पाउने बजेट कहाँ र कसरी खर्च भइरहेको छ भन्नेबारे स्थानीयलाई पर्याप्त जानकारी नभएको गुनासो गर्नुभयो ।
महागढीमाई नगरपालिका–३ का वडाध्यक्ष उपेन्द्रप्रसाद जैसवालका अनुसार नगरपालिकाको वार्षिक कार्यक्रमअन्तर्गत जीर्ण सडकको मर्मतलाई प्राथमिकतामा राखिएको हो ।
यसैबीच, करिब साढे १६ किलोमिटर लामो कलैया–मलाही सडकलाई कालोपत्रे गर्ने ठेक्का सम्झौतासम्बन्धी सूचना मधेश प्रदेश सरकारले हालै सार्वजनिक गरेको छ। कालोपत्रेको काम अघि बढेपछि लामो समयदेखि सडकको दुरवस्थाबाट प्रभावित स्थानीयलाई राहत पुग्ने अपेक्षा गरिएको छ ।
