महोत्तरीमा दाइजोको निहुँमा ससुराली पक्षले दिएको यातनाका कारण विवाह भएको दुई महिना नपुग्दै एक युवतीको मृत्यु भएको आरोप लगाइएको छ ।
भारतको सुरसण्ड निवासी २२ वर्षीया शिवानी राउतको महोत्तरीको पिपरा गाउँपालिका–५ स्थित ससुरालीमा मृत्यु भएको हो । मृतककी आमा रुवी देवीले दाइजोमा मोटरसाइकल, सुनलगायतका थप सामग्री नदिएको भन्दै ससुराली पक्षले छोरीलाई पटक–पटक शारीरिक तथा मानसिक यातना दिने गरेको र त्यही कारण उनको मृत्यु भएको आरोप लगाएकी छन् ।
रुवीका अनुसार महोत्तरीको जलेश्वर नगरपालिका–८, रमौलस्थित मामाघरमा मुण्डन कार्यक्रममा सहभागी हुन आएकी उनी छोरी शिवानीलाई भेट्न पिपरास्थित ससुराली पुगेकी थिइन् । भेटका क्रममा शिवानीले दाइजोमा मोटरसाइकल र सुन नदिएको भन्दै आफूलाई ससुराली पक्षले मानसिक तथा शारीरिक यातना दिने गरेको बताएकी थिइन् । छोरीलाई समेत मुण्डन कार्यक्रममा सहभागी हुन पठाइदिन आग्रह गर्दा ससुराली पक्षले मोटरसाइकल र सुन नदिएसम्म कतै जान नदिने जवाफ दिएको रुवीले बताइन् ।
“दिउँसो करिब २ बजे छोरीलाई भेटेर म त्यहाँबाट आएँ । चार घण्टापछि साँझ छोरीको मृत्यु भएको खबर पाएँ,” रुवीले भनिन् । घटनाको खबर पाएपछि तत्कालै प्रादेशिक अस्पताल जनकपुर पुगेकी रुवीले छोरीको घाँटीमा निलडाम देखेको बताएकी छन् । उनले ससुराली पक्षले घाँटी थिचेर छोरीको हत्या गरेको आरोप लगाउँदै जिल्ला प्रहरी कार्यालय महोत्तरीमा जाहेरी दिएकी छन् ।
जाहेरीमा मृतकका पति सजन राउत, देवरद्वय प्रेम राउत र निराजन राउत तथा सासू नूतन देवीलाई विपक्षी बनाइएको छ ।
जाहेरीअनुसार शिवानीको विवाह सजन राउतसँग २०८३ साल असार १६ गते भएको थियो । विवाहका क्रममा आफ्नो क्षमताअनुसार दाइजो तथा अन्य सामग्री दिएको भए पनि विवाहपछि सुनसहित थप दाइजो र मोटरसाइकल माग गर्दै ससुराली पक्षले शिवानीलाई पटक–पटक शारीरिक तथा मानसिक यातना दिने गरेको आरोप लगाइएको छ ।
मृतकका मामा तथा जलेश्वर नगरपालिका–८ निवासी दिपुकुमार कापरका अनुसार भदौ ४ गते राति करिब ७ बजे शिवानीले आफूलाई श्रीमान्, सासू तथा देवरहरूले मोटरसाइकल ल्याउन दबाब दिँदै घाँटी दबाउने, कुटपिट गर्ने तथा मानसिक यातना दिने गरेको बताएकी थिइन् । कापरले दाइजोकै कारण शिवानीको मृत्यु भएको दाबी गरेका छन् । उनका अनुसार ससुराली पक्षले शिवानीले झुन्डिएर आत्महत्या गरेको बताएको भए पनि शवको अवस्था हेर्दा घटना शंकास्पद देखिएको छ ।
शवको पोस्टमार्टम प्रादेशिक अस्पताल जनकपुरमा नगराई थप परीक्षणका लागि धरान अस्पताल पठाइएको कापरले जानकारी दिए । प्रहरीमा परेको जाहेरीमा भने शिवानीले दाइजो तथा मोटरसाइकलका लागि निरन्तर शारीरिक र मानसिक यातना सहनुपरेको र सोही कारण आत्महत्या गर्न बाध्य भएको आरोप लगाइएको छ । घटनामा प्रहरीले पति र सासूसहित तीन जनालाई आवश्यक अनुसन्धानका लागि पक्राउ गरेको जनाएको छ ।
जिल्ला प्रहरी कार्यालय महोत्तरीका प्रवक्ता प्रहरी नायब उपरीक्षक पञ्चलाल गोलेले घटनासम्बन्धी जाहेरी प्राप्त भएको र घटनाबारे आवश्यक अनुसन्धान भइरहेको बताए । प्रहरीले घटनाको वास्तविक कारण पोस्टमार्टम तथा अनुसन्धानबाट खुल्ने जनाएको छ ।
