बारा । भोटेकोशीमा आएको विनाशकारी बाढीबाट प्रभावित तथा पीडित परिवारका लागि राहत संकलन गर्ने उद्देश्यले बाराको कोल्हबी नगर उद्योग वाणिज्य संघको पहलमा बिहीबार सर्वपक्षीय बैठक सम्पन्न भएको छ । बैठकले राहत संकलनका लागि १५ सदस्यीय समिति गठन गरेको छ ।
कोल्हबी नगर उद्योग वाणिज्य संघको आयोजनामा भएको बैठकमा कोल्हबी नगरपालिकाका नगर प्रमुख रामप्रसाद चौधरी र उपप्रमुख लक्ष्मीकुमारी चौधरीको विशेष उपस्थिति थियो। बैठकमा विभिन्न राजनीतिक दलका प्रमुख तथा प्रतिनिधि, राष्ट्रिय स्वतन्त्र पार्टी (रास्वपा) कोल्हबी नगर कमिटीका उपसभापति जितनप्रसाद चौधरी, व्यापारी, सहकारीकर्मी, सामाजिक संघसंस्थाका प्रतिनिधि तथा सञ्चारकर्मीको सहभागिता थियो ।
बैठकले बाढी प्रभावित तथा पीडित परिवारलाई आवश्यक राहत सामग्री उपलब्ध गराउन कोल्हबी नगर क्षेत्रमा व्यापक रूपमा सहयोग संकलन अभियान सञ्चालन गर्ने निर्णय गरेको छ। अभियानमार्फत राजनीतिक दल, व्यापारी, सामाजिक संघसंस्था, सहकारी, सञ्चारकर्मी तथा सर्वसाधारण नागरिकसँग सहयोगका लागि अपिल गरिने भएको छ ।
राहत संकलन समितिको संयोजकमा कोल्हबी नगर उद्योग वाणिज्य संघका तर्फबाट रामप्रसाद प्रसाई चयन भएका छन् । समितिका सदस्यहरूमा नागरिक उन्मुक्ति पार्टी नेपालका तर्फबाट भुवन चौधरी, नेकपाका तर्फबाट रामचन्द्र साफी, नेपाली कांग्रेसका तर्फबाट वीरेन्द्र चौधरी, नेकपा एमालेका तर्फबाट पुरनदेव चौधरी, ब्लोदानका तर्फबाट रामकुमार उप्रेती, सहकारी क्षेत्रका तर्फबाट पारसनाथ चौधरी, थारू कल्याणकारी सभा (थाकस) का तर्फबाट रामनाथ चौधरी, पत्रकारिता क्षेत्रका तर्फबाट धीरेन्द्र पनुहर तथा महिला प्रतिनिधिका रूपमा प्रेमकुमारी चौधरीलगायत रहेका छन् ।
बैठकमा सहभागीहरूले प्राकृतिक विपद्का कारण पीडामा परेका नागरिकलाई सहयोग गर्न सबै पक्ष एकजुट हुनुपर्नेमा जोड दिएका थिए। उनीहरूले राजनीतिक तथा सामाजिक भिन्नताभन्दा माथि उठेर मानवीय सेवामा सक्रिय हुनुपर्ने धारणा राखेका थिए ।
संकलित राहत सामग्री तथा आर्थिक सहयोगलाई पारदर्शी रूपमा व्यवस्थापन गरी वास्तविक बाढीपीडित परिवारसम्म पुर्याउने समितिले जनाएको छ । कोल्हबी नगर क्षेत्रबाट मानवीय सहयोग जुटाएर विपद्मा परेका नागरिकलाई राहत उपलब्ध गराउने उद्देश्यले अभियानलाई प्रभावकारी रूपमा अघि बढाइने बताइएको छ ।
राहत संकलन अभियानमा नगरवासीलाई आफ्नो क्षमता र हैसियतअनुसार सहयोग गर्नसमेत बैठकले आग्रह गरेको छ ।
बैठकको सहजीकरण कोल्हबी नगर उद्योग वाणिज्य संघका उपाध्यक्ष प्रेमनारायण चौधरीले गरेका थिए ।
