भोटेकोशी नदीमा आएको आकस्मिक बाढीबाट ठूलो जनधनको क्षति भएपछि महोत्तरीका चार स्थानीय तहले बाढीपीडितको उद्धार, राहत तथा पुनर्स्थापनाका लागि आर्थिक सहयोग गर्ने निर्णय गरेका छन् ।
बाढीबाट प्रभावित नागरिकको पीडामा साथ दिँदै बर्दिबास, भंगहा, गौशाला र औरही नगरपालिकाले कुल ४२ लाख ५१ हजार रुपैयाँ सहयोग गर्ने घोषणा गरेका हुन् । स्थानीय तहहरूले विपद्को समयमा मानवीय सहयोग तथा सामाजिक उत्तरदायित्व निर्वाह गर्ने उद्देश्यले सहयोग रकम उपलब्ध गराउने निर्णय गरेका जनाएका छन् । बर्दिबास नगरपालिकाले १२ लाख ५१ हजार रुपैयाँ सहयोग गर्ने भएको छ ।
नगर प्रमुख प्रह्लाद क्षेत्रीका अनुसार भोटेकोशी बाढीबाट प्रभावित नागरिकलाई तत्काल राहत तथा पुनर्स्थापनामा सहयोग पुर्याउने उद्देश्यले उक्त रकम उपलब्ध गराउने निर्णय गरिएको हो । त्यस्तै, भंगहा नगरपालिकाले १५ लाख रुपैयाँ विपद् व्यवस्थापन कोषमा सहयोग गर्ने घोषणा गरेको छ । नगरप्रमुख सञ्जीवकुमार साहद्वारा जारी सन्देशमा देशमा आएको बाढी, पहिरो तथा अन्य प्राकृतिक विपद्बाट प्रभावित नागरिकको उद्धार तथा राहतका लागि सामाजिक उत्तरदायित्व निर्वाह गर्दै उक्त रकम सहयोग गर्ने उल्लेख गरिएको छ ।
यसअघि गौशाला नगरपालिकाले १० लाख रुपैयाँ सहयोग गर्ने निर्णय गरिसकेको छ । भोटेकोशी बाढीपीडितका लागि मानवीय पहलस्वरूप उक्त रकम सहयोग गर्ने निर्णय गरिएको नगर प्रमुख डा. दीपेन्द्र महतोले जानकारी दिनुभयो । विपद्को कठिन घडीमा प्रभावित परिवारप्रति ऐक्यबद्धता जनाउँदै नगरपालिकाको साथ र सहयोग निरन्तर रहने उहाँले बताउनुभयो ।
त्यसैगरी, औरही नगरपालिकाले ५ लाख रुपैयाँ प्रधानमन्त्री दैवी प्रकोप उद्धार कोषमा सहयोग गर्ने घोषणा गरेको छ । नगरप्रमुख प्रदीपकुमार खड्काले विपद्बाट प्रभावित नागरिकको राहत तथा उद्धारका लागि नगरपालिकाको तर्फबाट उक्त रकम सहयोग गर्ने घोषणा गर्नुभएको हो ।
चारवटै नगरपालिकाले विपद्मा परेका नागरिकलाई राहत उपलब्ध गराउनुका साथै प्रभावित क्षेत्रमा उद्धार तथा पुनर्स्थापनाका काममा सहयोग पुर्याउने उद्देश्यले आर्थिक सहयोग गर्ने निर्णय गरिएको जनाएका छन् । भोटेकोशी नदीमा आएको बाढीपछि रसुवा, नुवाकोट, धादिङ, चितवनलगायतका जिल्लामा ठूलो मानवीय तथा भौतिक क्षति भएको छ ।
विपद्को प्रभाव महोत्तरीमा प्रत्यक्ष नपरे पनि रोजगारी, व्यवसाय तथा अन्य कामका सिलसिलामा रसुवालगायतका क्षेत्रमा पुगेका महोत्तरीका नागरिकसमेत प्रभावित भएका छन् । बाढीपछि महोत्तरीका विभिन्न स्थानीय तहका केही नागरिक सम्पर्कविहीन भएको विवरणसमेत सार्वजनिक भएको छ ।
