सर्लाहीको बलरा नगरपालिका–७ डुमरियास्थित बरहथवा–मधुवनी सडकखण्डमा शुक्रबार राति भारतीय नम्बर प्लेटको मोटरसाइकल दुर्घटना हुँदा दुई युवकको मृत्यु भएको छ भने एक जना गम्भीर घाइते भएका छन् ।
दुर्घटनामा मोटरसाइकल चालक बलरा नगरपालिका–६ का १७ वर्षीय अभिनाश बैठा र मोटरसाइकलको बीचमा सवार १८ वर्षीय रोहित बैठाको मृत्यु भएको जिल्ला प्रहरी कार्यालय सर्लाहीले जनाएको छ । प्रहरीका अनुसार दुर्घटनामा घाइते भएका अभिनाशको प्रादेशिक अस्पताल मलङ्गवामा उपचारका क्रममा मृत्यु भएको हो। रोहितको भने थप उपचारका लागि वीरगन्ज लैजाने क्रममा बाटोमै मृत्यु भएको प्रहरीले जनाएको छ ।
दुर्घटनामा मोटरसाइकलको पछाडि सवार भारतको बिहार राज्य, सितामढी जिल्ला, बथनाहा रनैउली–१० घर भई हाल बलरा नगरपालिका क्षेत्रमा बस्दै आएका २४ वर्षीय शनिकुमार बैठा गम्भीर घाइते भएका छन्। उनको हाल वीरगन्जमा उपचार भइरहेको छ । प्रहरीका अनुसार मोटरसाइकल सडकबाट करिब साढे पाँच फिट तल रहेको पुलको साइफनमा खसेको थियो ।
सर्लाही प्रहरीका प्रवक्ता एवं प्रहरी नायब उपरीक्षक वेदप्रसाद गौतमका अनुसार मोटरसाइकल तीव्र गतिमा चलाइएका कारण दुर्घटना भएको प्रारम्भिक अनुसन्धानबाट खुलेको छ ।
