रसुवा जिल्लामा कार्यरत मधेश प्रदेशका सुरक्षाकर्मीमध्ये दुई नेपाली सेनासहित पाँचजना सम्पर्कविहीन भएका छन् ।
रसुवाका विभिन्न प्रहरी चौकी तथा नेपाली सेनामा कार्यरत उनीहरूसँग भोटेकोशीमा बुधबार आएको बाढीपछि सम्पर्क हुन नसकेको विवरण मधेश प्रदेश प्रहरी कार्यालय, जनकपुरधामले संकलन गरेको छ । भोटेकोशीको बाढीपछि तीन नेपाली सेनासहित १२ जना सुरक्षाकर्मी सम्पर्कविहीन भएका थिए । तीमध्ये एक नेपाली सेनासहित सातजना सम्पर्कमा आइसकेका छन् भने दुई नेपाली सेनासहित पाँचजना अझै सम्पर्कविहीन रहेको मधेश प्रदेश प्रहरी कार्यालय, जनकपुरधामले जनाएको हो ।
मधेश प्रदेश प्रहरी कार्यालयका प्रवक्ता तथा सूचना अधिकारी प्रहरी वरिष्ठ उपरीक्षक प्रभुप्रसाद ढकालका अनुसार प्रहरी चौकी गोल्जुङबेँसीबाट इलाका प्रहरी कार्यालय टिमुरेमा कार्यरत पर्साको पर्सागढी नगरपालिका–९ का प्रहरी हवल्दार श्रवणकुमार यादव सम्पर्कविहीन छन् । उनी २०८३ वैशाख १२ गतेदेखि फिल्डमा खटिएका थिए ।
त्यसैगरी रौतहटको गौर नगरपालिका–९ निवासी तथा रसुवागढीस्थित प्रहरी चौकीबाट अस्थायी प्रहरी पोस्ट मैलुङमा कार्यरत प्रहरी हवल्दार नवीनकुमार सिंह पनि सम्पर्कविहीन छन् । सिंह २०८२ माघ ७ गतेदेखि उक्त स्थानमा कार्यरत रहेका थिए ।
सर्लाहीको रामनगर गाउँपालिका–२ निवासी तथा जिल्ला प्रहरी कार्यालय रसुवामा कार्यरत प्रहरी जवान गजेन्द्र राय पनि सम्पर्कविहीन छन् । त्यस्तै, नेपाली सेनाको श्री सुवेश मैलुङ पोस्ट, रसुवामा कार्यरत रौतहटको मौलापुर नगरपालिका–७, सगैयाका सिपाही अभिषेक गुप्ता तथा रसुवामा नेपाली सेनामा कार्यरत बाराको सुवर्ण गाउँपालिका–१ का सुरजकुमार साहसँग पनि सम्पर्कविहीन हुन सकेको छैन ।
यसैबिच, रसुवामा कार्यरत मधेश प्रदेशका सात सुरक्षाकर्मी सम्पर्कमा आएका छन् । पर्साको पोखरिया नगरपालिका–५, सतवरिया निवासी तथा रसुवाको धुन्चेमा कार्यरत प्रहरी जवान ओजिर अंसारी र रौतहटको राजदेवी नगरपालिका–२ निवासी तथा प्रहरी चौकी सरमथली पाँचच्याङबाट प्रहरी चौकी बेत्रावतीमा कार्यरत प्रहरी हवल्दार सुरेन्द्र बैठा सम्पर्कमा आइसकेका छन् ।
यस्तै, रसुवामा सशस्त्र प्रहरी सेवामा कार्यरत रौतहटको बौधीमाई नगरपालिका–८ का प्रहरी जवान मुकेश गोसाई, इलाका प्रहरी कार्यालय कालिकास्थानमा कार्यरत सर्लाहीको कबिलासी नगरपालिका–९, गैर बजार निवासी रमेश राय यादव तथा जिल्ला प्रहरी कार्यालय रसुवाअन्तर्गत महिला तथा बालबालिका सेवा केन्द्रबाट प्रहरी चौकी स्याफ्रुबेँसीमा कार्यरत धनुषाको हंसपुर नगरपालिका–४ का प्रहरी सहायक हवल्दार गणेश मण्डल पनि सम्पर्कमा आइसकेका प्रहरी वरिष्ठ उपरीक्षक ढकालले जानकारी दिए ।
यस्तै, जिल्ला प्रहरी कार्यालय रसुवामा कार्यरत कार्यालय सहयोगी सप्तरीको कञ्चनरुप नगरपालिका–८ का अजय मरिक तथा रसुवामा नेपाली सेनामा कार्यरत बाराको जितपुरसिमरा उपमहानगरपालिका–१२, शक्तिटोलका रोवितकुमार साह पनि सम्पर्कमा आएका छन् ।
रसुवामा कार्यरत सुरक्षाकर्मीमध्ये सम्पर्कविहीन भएकाहरूको अवस्था यकिन गर्न सम्बन्धित सुरक्षा निकायले खोजी तथा समन्वय गरिरहेको प्रहरी वरिष्ठ उपरीक्षक ढकालले जानकारी दिएका छन् ।
-1788077612.jpg)
