मधेश प्रदेशमा उद्योग व्यवस्थापन सूचना प्रणाली (आईएमआईएस) मार्फत अनलाइन उद्योग दर्ता, नवीकरणलगायतका सेवा औपचारिक रूपमा सुरु भएको छ ।
अनलाइन सेवा सुरु भएसँगै उद्योगी तथा उद्यमीले उद्योगसम्बन्धी सेवा लिन सम्बन्धित कार्यालयमा पटक–पटक धाउनुपर्ने बाध्यता कम हुने अपेक्षा गरिएको छ । जनकपुरधाममा शुक्रबार उद्योग, वाणिज्य तथा पर्यटनमन्त्री कनिष पटेलले अनलाइन उद्योग दर्ता सेवाको उद्घाटन गर्दै सेवाग्राहीले घरमै बसेर अनलाइनमार्फत उद्योग दर्ताका लागि आवश्यक प्रक्रिया पूरा गर्न सक्ने व्यवस्था मधेश प्रदेशबाट सुरु गरिएको बताए । उनले नयाँ प्रणालीबारे आम नागरिक, उद्योगी तथा उद्यमीलाई जानकारी गराउन आवश्यक रहेको बताए ।
मन्त्री पटेलले विदेशमा रोजगारीका लागि जान चाहने युवालाई विदेश जान खर्च गर्ने रकम आफ्नै गाउँठाउँमा साना तथा मझौला उद्योग स्थापना गर्न लगानी गर्न आग्रह गरे । अनलाइन सेवा सुरु भएपछि उद्योग दर्ता तथा नवीकरणलगायतका काममा उद्योगी–उद्यमीलाई थप सहजता हुने उनले विश्वास व्यक्त गरे ।
उद्योग विभागकी महानिर्देशक रीया साहले मधेश प्रदेशका आठवटै जिल्लाबाट साना तथा मझौला उद्योग अनलाइनमार्फत दर्ता गर्न सकिने जानकारी दिइन् । उनका अनुसार उद्योग दर्ताका लागि सेवाग्राहीले अनलाइन फारम भर्नुका साथै आवश्यक कागजातसमेत अनलाइनमै अपलोड गर्नुपर्नेछ ।
अनलाइनमार्फत प्राप्त विवरण र कागजातको अध्ययनपछि सम्बन्धित कार्यालयले उद्योग दर्ताको प्रक्रिया अघि बढाउनेछ । दर्ता प्रक्रियाको अवस्थाबारे सेवाग्राहीलाई सम्पर्क वा अनलाइन माध्यमबाट जानकारी गराइने व्यवस्था गरिएको महानिर्देशक साहले बताइन् ।
उनका अनुसार दर्ताको अन्तिम चरणमा आवश्यक परे सम्बन्धित कार्यालयबाट उद्योग दर्ता प्रमाणपत्र उपलब्ध गराइनेछ । साथै, अनलाइन उद्योग दर्ताका क्रममा सेवाग्राहीलाई देखिएका समस्या तथा गुनासा सम्बोधन गर्न सम्बन्धित कार्यालयमा सम्पर्क व्यक्ति तोक्ने तयारीसमेत भइरहेको छ ।
सम्पर्क व्यक्तिमार्फत सेवाग्राहीले अनलाइन उद्योग दर्ता तथा सम्बन्धित सेवाका क्रममा देखिएका समस्या, कठिनाइ वा अन्य गुनासाबारे जानकारी गराउन सक्ने व्यवस्था मिलाइने महानिर्देशक साहले जानकारी दिइन् ।
भिडियाे रिपाेर्ट
