सुखचैन गाउँस्थित धार्मिक तथा सांस्कृतिक महत्त्व बोकेको शिव मन्दिरको संरक्षण र व्यवस्थापनमा चरम ढिलाइ भएको भन्दै स्थानीयवासीले विरोध जनाएका छन् ।
मन्दिरको नियमित सरसफाइ, पानीको उचित निकास तथा आवतजावत गर्ने बाटोको व्यवस्थापन हुन नसक्दा श्रद्धालुहरूले सास्ती खेप्नुपरेको भन्दै सम्बन्धित निकायलाई ध्यानाकर्षण गराएकाे हाे ।स्थानीयवासीका अनुसार पूर्व वडाध्यक्ष ब्रह्मदेव राउत कुर्मीको पाँचवर्षे कार्यकालमा शिव मन्दिर संरक्षणका लागि कुनै पनि ठोस काम भएको थिएन् । त्यसपछि निर्वाचित वर्तमान वडाध्यक्ष उमाशंकर तिवारीको कार्यकालमा पनि मन्दिरको संरक्षण तथा व्यवस्थापनमा अपेक्षित प्रगति हुन नसकेको स्थानीयहरूको गुनासो रहेकाे छ ।
मन्दिर परिसरमा वर्षायामको पानी जम्ने र निकासको व्यवस्था नहुँदा दुर्गन्ध फैलने तथा हिलाम्मे हुने समस्या वर्षौँदेखि यथावत् रहेको छ । यसका साथै, व्यवस्थित बाटो नहुँदा मन्दिर पुग्ने श्रद्धालु तथा गाउँलेलाई आवतजावतमा निकै कठिनाइ भइरहेको छ । यसबारे पटक–पटक आग्रह गर्दा पनि समस्या समाधानका लागि ठोस कदम नचालिएको स्थानीयको भनाइ छ ।
यसैगरी गत वर्ष असार महिनामा गाउँका सम्पूर्ण बासिन्दाको उपस्थितिमा वडाध्यक्ष तिवारीले दुई महिनाभित्र शिव मन्दिरको समस्या समाधान गर्ने प्रतिबद्धता जनाएका थिए । तर, लामो समय बितिसक्दा पनि प्रतिबद्धताअनुसार काम अघि नबढाएको भन्दै स्थानीयवासीले असन्तुष्टि तथा विरोध जनाईरहेका छन् ।
जनप्रतिनिधिले सार्वजनिक रूपमा गरेका प्रतिबद्धता व्यवहारमा कार्यान्वयन हुनुपर्ने भन्दै, “दुई महिनाभित्र समस्या समाधान गर्ने प्रतिबद्धता जनाइए पनि अहिलेसम्म काम किन सुरु हुन सकेन ?” पटक–पटक आश्वासन मात्र पाउने तर समस्या यथावत् रहने अवस्थाको अन्त्य गरी समस्या समाधान गर्नुपर्ने स्थानीयकाे भनाइ छ ।
यता स्थानीय नरेश यादव सहित अन्य गाउँलेहरूले धार्मिक आस्थासँग जोडिएको मन्दिरको संरक्षण कार्यलाई पहिलो प्राथमिकतामा राख्न माग गरेका छन् । उनीहरूले आवश्यक बजेट, कार्यादेश तथा व्यवस्थापकीय प्रक्रिया छिटो टुंग्याएर मन्दिर परिसरको सरसफाइ, पानी निकास र बाटो निर्माणको काम तत्काल सुरु गर्न सम्बन्धित निकायसँग आग्रह गरेका छन् ।
यता यस विषयमा वडाध्यक्ष उमाशंकर तिवारीले भने विगत चार वर्षको अवधिमा शिव मन्दिरमा रंगरोगनको काम मात्र सम्पन्न भएको बताएका छन् । यस वर्ष महानगरपालिकाबाट आवश्यक कार्यादेश तथा अख्तियारी प्राप्त नभएकाले मन्दिर संरक्षण तथा व्यवस्थापनका बाँकी काम अघि बढाउन नसकिएको उनको भनाइ छ । महानगरबाट आवश्यक कार्यादेश र अख्तियारी प्राप्त हुनासाथ काम अगाडि बढाइने उनले स्पष्ट पारे ।
भिडियाे रिपाेर्ट
