पर्साको सखुवाप्रसौनी गाउँपालिकामा प्रमुख प्रशासकीय अधिकृत रामबाबू कुशवाहाको सरुवाको विषयलाई लिएर विवाद पुनः चर्किएको छ । गाउँपालिका अध्यक्ष जसवन्त यादव र प्रमुख प्रशासकीय अधिकृत कुशवाहाबीचको पुरानो विवाद बल्झिएपछि प्रशासनिक कामकाज तथा विकास निर्माण प्रभावित भएको आरोप लागेको छ ।
गत आर्थिक वर्षमा सरुवा भएर आएका कुशवाहालाई अध्यक्ष यादवले नरुचाएपछि फिर्ता पठाइएको र त्यसयता दुई जनाबीच विवाद रहँदै आएको बताइएको छ । यसपटक पनि मन्त्रालयले कुशवाहालाई नै गाउँपालिकामा सरुवा गरेर पठाएपछि विवाद थप चर्किएको हो ।
गाउँपालिका उपाध्यक्ष शर्मिला विष्टले कुशवाहालाई पुनः सरुवा गराउन अध्यक्ष यादव काठमाडौंमै बसेर चलखेल गरिरहेको आरोप लगाएकी छन् । सार्वजनिक अपिल जारी गर्दै उनले अध्यक्ष यादवको व्यक्तिगत स्वार्थ र आकाङ्क्षाका कारण गाउँपालिकाको विकास निर्माण तथा सेवा प्रवाह प्रभावित भएको दाबी गरेकी छन् ।
उपाध्यक्ष विष्टका अनुसार आर्थिक वर्ष २०८३/८४ को बजेट गाउँसभाबाट पारित भइसके पनि गाउँपालिकाको खाता सञ्चालन हुन सकेको छैन । यसका कारण विकास निर्माणका योजना तथा कार्यक्रम कार्यान्वयनमा अवरोध सिर्जना भएको उनको भनाइ छ ।
उनले गाउँपालिकामा कार्यरत कर्मचारी, शिक्षक तथा अन्य कर्मचारीले महिनौँदेखि तलब, भत्ता र सेवा–सुविधा नपाएको दाबीसमेत गरेकी छन् । चाडपर्व नजिकिँदासमेत पारिश्रमिक नपाउँदा कर्मचारीहरू समस्यामा परेको र त्यसको असर सार्वजनिक सेवा प्रवाहमा समेत परेको उनले उल्लेख गरेकी छन् ।
त्यस्तै, वडा तहका विकास योजना अघि बढ्न नसकेको तथा निःशुल्क एम्बुलेन्स सेवा सञ्चालन गर्ने घोषणा गरिए पनि इन्धन अभावका कारण सेवा दिन नसकिएको विषयलाई उपाध्यक्ष विष्टले सार्वजनिक अपिलमार्फत उठाएकी छन् ।
उपाध्यक्ष विष्टले अध्यक्ष यादवलाई व्यक्तिगत स्वार्थ, रिस, द्वेष र घमण्ड त्यागेर गाउँपालिकाको खाता सञ्चालन गर्न तथा रोकिएका विकास निर्माणका काम अघि बढाउन आग्रह गरेकी छन् । जनताको हितलाई प्राथमिकतामा राख्दै शान्तिपूर्ण वातावरणमा काम गर्नसमेत उनले अध्यक्ष यादवसँग अपिल गरेकी छन् ।
