बैंक तथा डिजिटल वालेटका कर्मचारी बनेर केवाईसी (KYC) अपडेट गर्ने बहानामा ४९ लाख ८७ हजार रुपैयाँ ठगी गरेको आरोपमा दुई भारतीय नागरिकसहित तीन जनाविरुद्ध प्रहरीले मुद्दा दर्ता गरेको छ ।
फोन तथा भिडियो कलमार्फत सेवाग्राहीलाई मोबाइलको स्क्रिन सेयर गर्न लगाई ओटीपी (OTP) र बैंकिङ विवरण प्राप्त गरेर खाताबाट रकम स्थानान्तरण गरेको आरोपमा प्रहरीले उनीहरूलाई गत शुक्रबार पक्राउ गरेको थियो। पक्राउ परेकाविरुद्ध मंगलबार ठगी तथा संगठित अपराधसम्बन्धी कसुरमा मुद्दा दर्ता गरिएको हो ।
जिल्ला प्रहरी कार्यालयका डीएसपी वसन्त गौतमका अनुसार पक्राउ पर्नेमा गौर नगरपालिका–३ स्थित पोखरिया टोलमा डेरा गरी बस्ने भारतको बिहार राज्य, सीतामढी जिल्लाको बैरगनियाका २४ वर्षीय मोहम्मद साहिल, २२ वर्षीया सलोनी कुमारी सोनी र गौर नगरपालिका–५ का १८ वर्षीय नितेश कुशवाहा रहेका छन् ।
डीएसपी गौतमले उनीहरूविरुद्ध ठगी तथा संगठित अपराधसम्बन्धी कसुरमा मुद्दा दर्ता गरी अनुसन्धान भइरहेको जानकारी दिए। अनलाइन ठगीमा अन्य व्यक्तिको समेत संलग्नता हुन सक्ने आशंकामा प्रहरीले थप अनुसन्धान र खोजी गरिरहेको उनले बताए ।
प्रहरीका अनुसार पक्राउ परेकाहरूको साथबाट नेपाली रुपैयाँ १ लाख ६२ हजार २१० र भारतीय रुपैयाँ ३ हजार २३६ बरामद भएको छ ।
त्यसैगरी, प्रहरीले सात थान मोबाइल, ११ थान सिमकार्ड, विभिन्न बैंक तथा वित्तीय संस्थाका ३० थान डिपोजिट भौचर, तीन थान एटीएम कार्ड र दुई थान चेकसमेत बरामद गरेको जनाएको छ ।
प्रहरीले अनलाइन ठगीमा अन्य व्यक्तिको संलग्नताबारे अनुसन्धान जारी राखेको छ ।
