मधेस प्रदेश लोक सेवा आयोगले प्रदेश निजामती सेवातर्फ अधिकृत सातौँ र आठौँ तहका पदमा भर्नाका लागि विज्ञापन प्रकाशन गर्ने प्रक्रिया रोकेको छ । मुख्यमन्त्री तथा मन्त्रिपरिषद्को कार्यालयले रिक्त पदपूर्तिका लागि माग नपठाएपछि आयोगले निर्धारित समयमै विज्ञापन खोल्न नसकेको हो ।
आयोगको वार्षिक कार्यतालिकाअनुसार असोज महिनाको अन्तिम बिहीबार अर्थात् असोज २९ गते प्राविधिक र अप्राविधिकतर्फका अधिकृत पदको विज्ञापन खुल्नुपर्ने थियो । तर, प्रदेश सरकारअन्तर्गतका निकायमा सङ्गठन तथा व्यवस्थापन (ओएण्डएम) सर्वेक्षण जारी रहेकाले कर्मचारीको माग तत्काल पठाउन नसकिने जानकारी मुख्यमन्त्री कार्यालयले आयोगलाई गराएको थियो ।
प्रदेश निजामती सेवा ऐन, २०७७ अनुसार रिक्त पदपूर्तिका लागि मुख्यमन्त्री तथा मन्त्रिपरिषद्को कार्यालयले निर्धारित समयमै पदको विवरण लोक सेवा आयोगमा पठाउनुपर्ने व्यवस्था छ। तर, कर्मचारी दरबन्दी कटौती गर्ने सरकारी योजनाका कारण पदपूर्ति प्रक्रिया प्रभावित भएको हो ।
मुख्यमन्त्री कार्यालयले असोज २३ गते आयोगलाई पठाएको पत्रमा प्रमुख सचिवको संयोजकत्वमा साउन ११ गते बसेको सचिव बैठकको निर्णय उल्लेख गरिएको छ। बजेट वक्तव्यको बुँदा नम्बर १०९ लाई आधार मान्दै पत्रमा कर्मचारी दरबन्दी कम्तीमा १५ प्रतिशत कटौती गर्नुपर्ने भएकाले ओएण्डएम सर्वेक्षण सम्पन्न नभएसम्म नयाँ पदपूर्ति र बढुवा रोकिएको जनाइएको छ ।
मधेस प्रदेश सरकारअन्तर्गतका निकायको ओएण्डएम कार्य सम्पन्न भइनसकेकाले तत्काल कर्मचारी माग गर्न नसकिएको मुख्यमन्त्री कार्यालयले स्पष्ट पारेको छ ।
मुख्यमन्त्री कार्यालयको पत्रपछि आयोगले असोज २८ गते अधिकृत तहको विज्ञापन हाललाई नखोल्ने निर्णय गरेको हो । आयोगले बिहीबार सूचना जारी गर्दै कार्यतालिकामा निर्धारित विज्ञापन हाललाई प्रकाशन गर्न नसकिने जानकारी सरोकारवालालाई गराएको छ ।
प्रदेश सरकारको निर्णयका कारण प्रदेश निजामती सेवामा प्रवेश गर्न तयारी गरिरहेका परीक्षार्थी प्रभावित भएका छन् । विज्ञापन कहिले खुल्ने भन्ने विषयमा भने स्पष्ट मिति सार्वजनिक भएको छैन ।
