नेपाली क्रिकेटको केन्द्र मानिने कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदान आगामी ६ महिना घरेलु तथा अन्तर्राष्ट्रिय प्रतियोगिताले व्यस्त रहने भएको छ ।
नेपाल प्रिमियर लिग ९एनपीएल० को तेस्रो संस्करणदेखि आईसीसी यू–१९ महिला टी–२० विश्वकपसम्मका प्रतियोगिता आयोजना हुने तालिकाले मैदानमा क्रिकेटको चहलपहल बढाउने भएको हो । यस अवधिमा एनपीएल, आईसीसी पुरुष क्रिकेट विश्वकप छनोट प्लेअफ, यू–१९ महिला टी–२० विश्वकप तथा नेपाल र बंगलादेशबीचको टी–२० अन्तर्राष्ट्रिय शृङ्खलालगायत प्रतियोगिता आयोजना गर्ने तयारी छ । यी प्रतियोगिताले नेपाली क्रिकेटलाई घरेलु प्रतिस्पर्धादेखि अन्तर्राष्ट्रिय स्तरसम्म आफ्नो क्षमता प्रदर्शन गर्ने अवसर प्रदान गर्नेछन् । विशेषगरी सन् २०२७ मा नेपालले आयोजना गर्न लागेको आईसीसी यू–१९ महिला टी–२० विश्वकप नेपाली क्रिकेटका लागि महत्त्वपूर्ण उपलब्धि हुनेछ । विश्वकपका केही खेल कीर्तिपुरस्थित त्रिवि क्रिकेट मैदानमा समेत सञ्चालन हुनेछन् ।
एनपीएलबाट सुरु हुनेछ व्यस्त तालिका
त्रिवि क्रिकेट मैदानमा प्रतियोगिताको व्यस्त तालिका कात्तिक ९ गतेदेखि सुरु हुनेछ । नेपाल क्रिकेट संघ ९क्यान० को आयोजनामा मंसिर ५ गतेसम्म नेपाल प्रिमियर लिग ९एनपीएल० को तेस्रो संस्करण सञ्चालन हुनेछ । प्रतियोगितामा आठ टोलीले उपाधिका लागि प्रतिस्पर्धा गर्नेछन् ।
तेस्रो संस्करणसम्म आइपुग्दा एनपीएलको व्यावसायिक र प्राविधिक पक्षमा थप सुधार गर्ने प्रयास गरिएको छ । यसपटक विदेशी स्टार खेलाडीको सहभागिता बढ्नुका साथै प्रतियोगितामा अत्याधुनिक प्रविधिको प्रयोगसमेत गरिनेछ । एनपीएलले अन्तर्राष्ट्रिय क्रिकेट परिषद् ९आईसीसी० बाट मान्यता पाएको छ । प्रतियोगिताका खेलले आधिकारिक टी–२० मान्यता प्राप्त गर्नेछन् ।
यस संस्करणमा पहिलोपटक निर्णय पुनरावलोकन प्रणाली ९डीआरएस० प्रयोग गर्ने तयारी गरिएको छ । क्यानका अनुसार एलबीडब्लुका निर्णय पुनरावलोकन गर्न पूर्ण थ्रीडी बल ट्र्याकिङ प्रविधि प्रयोग गरिनेछ । त्यस्तै, रनआउट, स्टम्पिङ र नो बलसम्बन्धी निर्णयमा पनि पुनरावलोकनको व्यवस्था हुनेछ ।
प्रविधिको प्रयोगमार्फत ब्याटमा बल लागेको छ वा छैन भन्ने पहिचान, हाइटसम्बन्धी वाइडको विश्लेषण, छक्काको दूरी र उचाइ मापन तथा बलिङसम्बन्धी अन्य तथ्याङ्कसमेत उपलब्ध गराइनेछ ।
एनपीएलले नेपाली खेलाडीलाई विदेशी खेलाडीसँग प्रतिस्पर्धा गर्ने अवसर प्रदान गर्नुका साथै घरेलु क्रिकेटको व्यावसायिक विकासमा योगदान पुर्याउने अपेक्षा गरिएको छ ।
डिसेम्बरमा विश्वकप छनोट प्लेअफ
एनपीएल सकिएपछि त्रिवि क्रिकेट मैदानमा आईसीसी पुरुष क्रिकेट विश्वकप छनोट प्लेअफ आयोजना हुनेछ । डिसेम्बर ४ देखि २१ अर्थात् मंसिर १८ देखि पुस ६ गतेसम्म सञ्चालन हुने प्रतियोगितामा आठ टोली सहभागी हुने तालिका छ ।
विश्वकप लिग–२ मा अन्तिम स्थानमा रहने चार टोली तथा च्यालेन्ज लिग ‘ए’ र ‘बी’ का शीर्ष दुई–दुई टोलीले प्लेअफ खेल्नेछन् । प्रतियोगितामा शीर्ष चार स्थान हासिल गर्ने टोलीले सन् २०२७ मा दक्षिण अफ्रिका र नामिबियामा आयोजना हुने एकदिवसीय विश्वकप छनोट प्रतियोगितामा स्थान बनाउनेछन् ।
यस प्रतियोगितामा नेपालसहित क्यानडा, संयुक्त अरब इमिरेट्स ९यूएई०, जर्सी, इटाली, युगान्डा तथा कुवेत र नामिबिया सम्भावित सहभागीका रूपमा उल्लेख गरिएका छन् ।
घरेलु मैदानमा आयोजना हुने यस प्रतियोगितामा नेपालका लागि विश्वकप छनोटको बाटो सहज बनाउने अवसर हुनेछ । अन्य सहभागी टोलीले पनि शीर्ष चारमा स्थान सुरक्षित गर्दै विश्वकप छनोटमा पुग्ने लक्ष्य राख्नेछन् ।
यू–१९ महिला टी–२० विश्वकप मुख्य आकर्षण
आगामी ६ महिनाको तालिकामा सबैभन्दा महत्त्वपूर्ण प्रतियोगिताका रूपमा आईसीसी यू–१९ महिला टी–२० विश्वकप रहनेछ । सन् २०२७ जनवरी २१ देखि फेब्रुअरी ६ अर्थात् माघ ७ देखि २३ गतेसम्म आयोजना हुने प्रतियोगिताका खेल नेपालका दुई मैदानमा सञ्चालन हुने तालिका छ ।
अन्तर्राष्ट्रिय क्रिकेट परिषद्ले सार्वजनिक गरेको खेल तालिकाअनुसार प्रतियोगिताका कुल ४१ खेलमध्ये १५ खेल नेपालमा आयोजना हुनेछन् । ती खेल कीर्तिपुरस्थित त्रिवि क्रिकेट मैदान र मुलपानी क्रिकेट मैदानमा सञ्चालन हुनेछन् । जसमध्ये त्रिवि मैदानमा सात खेल हुनेछन् ।
निर्धारित तालिकाअनुसार माघ ८, १०, १२ र १३ गते त्रिवि मैदानमा विश्वकपका खेल सञ्चालन हुनेछन् ।
विश्वकप आयोजनाका लागि त्रिवि क्रिकेट मैदानमा लामो समयदेखि तयारी भइरहेको छ । यस क्रममा आईसीसीका प्रतिनिधिहरूले समेत मैदानको निरीक्षण गरेका छन् ।
विश्वकपमा विभिन्न देशका युवा महिला टोलीले प्रतिस्पर्धा गर्नेछन् । नेपालमा यस स्तरको प्रतियोगिता आयोजना हुनुले महिला क्रिकेटको विकास, खेलाडीको अनुभव वृद्धि तथा अन्तर्राष्ट्रिय क्रिकेटमा नेपालको पहिचान विस्तारमा सहयोग पुग्ने अपेक्षा गरिएको छ ।
बंगलादेशसँग टी–२० अन्तर्राष्ट्रिय शृङ्खला
नेपालको क्रिकेट तालिकामा बंगलादेशसँगको टी–२० अन्तर्राष्ट्रिय शृङ्खलासमेत समावेश छ । निर्धारित कार्यक्रमअनुसार सन् २०२७ मार्च २६ देखि ३० अर्थात् चैत १२ देखि १६ गतेसम्म नेपाल र बंगलादेशबीच शृङ्खला आयोजना गर्ने योजना छ ।
यस शृङ्खलाले नेपाली राष्ट्रिय टोलीलाई बलियो अन्तर्राष्ट्रिय प्रतिद्वन्द्वीसँग प्रतिस्पर्धा गर्ने अवसर प्रदान गर्नेछ । साथै, घरेलु मैदानमा अन्तर्राष्ट्रिय खेल आयोजना हुँदा नेपाली समर्थकले राष्ट्रिय टोलीको खेल प्रत्यक्ष हेर्न पाउनेछन् ।
यता, मंसिरमा आयोजना गर्ने तयारी गरिएको नेपाल र भारत ‘ए’ टोलीबीचको टी–२० शृङ्खला भने विश्वकप छनोट प्लेअफसँग तालिका जुधेपछि स्थगित भएको छ । उक्त शृङ्खलाको नयाँ मिति छिट्टै घोषणा गर्ने बताइएको छ ।
पुस ६ गते विश्वकप छनोट प्लेअफ सकिएपछि माघ ७ गते यू–१९ महिला विश्वकप सुरु हुनुअघिसम्मको अवधिमा अन्य प्रतियोगिता आयोजना गर्ने सम्भावना पनि छ । यस अवधिमा भारत ‘ए’ सँगको स्थगित शृङ्खला सञ्चालन गर्न क्यानले पहल गर्न सक्ने अनुमान गरिएको छ ।
नेपाली क्रिकेटका लागि महत्त्वपूर्ण अवसर
एनपीएल, विश्वकप छनोट प्लेअफ, यू–१९ महिला टी–२० विश्वकप र बंगलादेशसँगको टी–२० अन्तर्राष्ट्रिय शृङ्खलाले आगामी महिनाहरूमा त्रिवि क्रिकेट मैदानलाई व्यस्त बनाउनेछन् ।
यी प्रतियोगिताले नेपाली खेलाडीलाई प्रतिस्पर्धात्मक अनुभव दिलाउनुका साथै नेपालमा क्रिकेटको लोकप्रियता बढाउन र अन्तर्राष्ट्रिय प्रतियोगिता आयोजना गर्ने क्षमताको प्रदर्शन गर्न सहयोग पुर्याउनेछन् ।
नेपालले आयोजना गर्न लागेको यू–१९ महिला टी–२० विश्वकप विशेष महत्त्वको प्रतियोगिता हुनेछ । यसले नेपाली महिला क्रिकेटलाई अन्तर्राष्ट्रिय मञ्चमा थप चिनाउने अवसर प्रदान गर्नेछ ।
यसरी घरेलु फ्रेन्चाइज क्रिकेटदेखि विश्वकप छनोट र अन्तर्राष्ट्रिय शृङ्खलासम्मका प्रतियोगिताका कारण कीर्तिपुरस्थित त्रिवि क्रिकेट मैदान आगामी ६ महिनासम्म नेपाली क्रिकेट गतिविधिको प्रमुख केन्द्रका रूपमा रहनेछ ।
-Recovered@1x_1-1792308710.jpg){kind=logo}