वीरगञ्जस्थित नारायणी अस्पतालमा हाल हैजाबाट सङ्क्रमित ६४ जना बिरामी उपचाररत रहेका छन् । अस्पतालका प्रवक्ता डा. उदयनारायण सिंहका अनुसार सबै बिरामीको अवस्था सामान्य रहेको छ ।
अस्पतालका तथ्याङ्कअनुसार भदौ ६ देखि ११ गतेसम्म २२६ जना झाडापखालाका बिरामी उपचारका लागि आएका थिए । तीमध्ये १६२ जना स्वास्थ्यलाभ गरी घर फर्किएका छन् भने ६ जनाको सघन उपचारकक्ष (आईसीयू) मा उपचार भइरहेको छ ।
यसैबीच बुधबार साँझसम्म ११० जनाको ‘कोलेरा आरडिटी’ परीक्षण गरिएकोमा ४८ जनामा हैजाको सङ्क्रमण पुष्टि भएको छ । आरडिटी पोजिटिभ भएका मध्ये १५ जनाको नमूना थप परीक्षण (कल्चर) का लागि प्रादेशिक जनस्वास्थ्य प्रयोगशाला पठाइएकोमा १२ जनामा ‘भिब्रिओ कोलेरा’ भेटिएको अस्पतालले जनाएको छ ।
