बारामा सोमबारदेखि हैजाविरुद्धको खोप अभियान सुरु भएको छ । स्वास्थ्य कार्यालय बाराले आइतबार जिल्लास्तरीय सञ्चारकर्मी अभिमुखीकरण कार्यक्रम आयोजना गर्दै खोप अभियानबारे जानकारी दिएको हो ।
जिल्लाका ६ वटा स्थानीय तहमा हैजाविरुद्धको खोप अभियान सञ्चालन हुने स्वास्थ्य कार्यालय बाराले जनाएको छ । ती स्थानीय तहहरूमा कलैया उपमहानगरपालिका, जीतपुरसिमरा उपमहानगरपालिका, फेटा गाउँपालिका, विश्रामपुर गाउँपालिका, प्रसौनी गाउँपालिका र परवानीपुर गाउँपालिका रहेका छन् ।
अभियान असोज २७ गतेदेखि कात्तिक २ गतेसम्म सञ्चालन हुनेछ । यस अवधिमा एक वर्षभन्दा माथिका सबै उमेर समूहका व्यक्तिहरूलाई खोप दिइनेछ । गर्भवती महिला तथा स्तनपान गराइरहेका महिलालाई समेत यो खोप दिन सकिने स्वास्थ्य कार्यालयले जनाएको छ ।
जिल्ला जनस्वास्थ्य कार्यालय बाराकी जनस्वास्थ्य अधिकृत कञ्चन नेपालीका अनुसार जिल्लाका ६ पालिकामा गरी ३ लाख ६५ हजार ९३१ जनालाई लक्षित गरी खोप अभियान सञ्चालन गरिएको हो ।
अभियानअन्तर्गत विभिन्न पालिकाका लक्षित जनसंख्या यसप्रकार छन् —
-
जीतपुरसिमरा उपमहानगरपालिका : १ लाख २७ हजार ९५६
-
कलैया उपमहानगरपालिका : १ लाख ३६ हजार ४३२
-
फेटा गाउँपालिका : २८ हजार ६३
-
विश्रामपुर गाउँपालिका : २४ हजार ३५७
-
प्रसौनी गाउँपालिका : २४ हजार ८२०
-
परवानीपुर गाउँपालिका : २४ हजार ३०३
खोप अभियान प्रभावकारी बनाउन २१० जना खोप कार्यकर्ता, ३७९ जना महिला स्वास्थ्य स्वयंसेविका र ३७९ जना स्वयंसेवक परिचालन गरिने स्वास्थ्य कार्यालयले जनाएको छ ।
