महोत्तरी | मधेशका बजारमा तरकारीको मूल्य एकाएक बढेपछि उपभोक्ताहरू पहाडबाट ल्याइने तरकारीतर्फ आकर्षित भइरहेका छन् । तिहारयता तराईका स्थानीय उत्पादन—काउली, बोडी, मुला, आलु, गोलभेँडा तथा विभिन्न सागसब्जी—को मूल्य तीव्र गतिमा बढेपछि उपभोक्ताले ‘सस्तो र स्वादिलो’ विकल्पका रूपमा पहाडे तरकारी रोज्न थालेका हुन् ।
बर्दीबासलगायत तराईका प्रमुख बजारमा सिन्धुली र रामेछापबाट ल्याइने इस्कुस, फर्सी, बरेला, रुख टमाटर, रायोको साग, आलु, माहिली खुर्सानी, साथै जुनार, सुन्तला, किवीजस्ता फलफूलले उपभोक्तालाई केही राहत दिएको स्थानीय उपभोक्ताको भनाइ छ ।
बर्दीबास बजारमा भेटिएकी मिथिला नगरपालिकाकी गृहिणी लक्ष्मी तामाङका अनुसार, तराईको तुलनामा ‘सस्तो र स्वादिलो’ हुने भएकैले सम्भव भएसम्म पहाडे तरकारी नै प्रयोग गर्ने गरेको बताइन् ।
स्थानीय बजारमा गत वर्ष १० रुपैयाँ किलोमा पनि नबिकेको काउली अहिले १४०–१५० रुपैयाँमा किन्न उपभोक्ता बाध्य छन् । भान्टा १००, आलु र गोलभेँडा ८०–९०, हरियो खुर्सानी १००, फर्सी ६०, तितेकरेला २४०, र बेथेको साग पाउ ६० रुपैयाँमा बिक्री भइरहेको छ । यसै बजारमा पहाडबाट आएको इस्कुस भने १०० रुपैयाँमा ४ किलो पाइन्छ। बरेला ६०, पहाडे आलु ७०, रुख गोलभेँडा ६०, हरियो फर्सी ३०, अदुवा १०० र माहिली खुर्सानी ९० रुपैयाँ प्रतिकिलो उपलब्ध छन् । तुलनात्मक रूपमा सस्तो हुँदा उपभोक्ताको आकर्षण पहाडे उत्पादनतर्फ बढेको व्यापारीहरूको भनाइ छ ।
फलफूल बजारमा जुनार ७५ र सुन्तला १३०–१५० रुपैयाँ प्रतिकिलोमा बिक्री भइरहे पनि सिन्धुली–रामेछापका व्यापारीले ताजा जुनार १०० रुपैयाँमा २ किलो र सुन्तला प्रतिकिलो १०० रुपैयाँमा उपलब्ध गराएपछि पहाडे फलफूल बेच्न व्यापारीहरूलाई भ्याइनभ्याइ भएको छ । सिन्धुली तीनपाटन–८ बाहुनतिल्पुङका व्यापारी होमराज श्रेष्ठका अनुसार बर्दीबासमा दैनिक करिब १० जना व्यापारीले ४ मिनी ट्रक बराबर पहाडे तरकारी र फलफूल आपूर्ति गरिरहेका छन् ।
