इन्डोनेसियाको मोलुका टापु नजिकै आज ७.४ म्याग्निच्युडको शक्तिशाली भूकम्प गएको छ । स्थानीय समयअनुसार बिहान ६:४८ बजे गएको भूकम्पले इन्डोनेसियासहित छिमेकी देशहरूमा सुनामीको जोखिम बढाएको छ ।
अमेरिकी भौगर्भिक सर्वेक्षणका अनुसार भूकम्पको केन्द्रविन्दु टेर्नेट शहरबाट करिब १२० किलोमिटर टाढा मोलुका सागरमा रहेको थियो । सुरुमा भूकम्पको तीव्रता ७.८ म्याग्निच्युड मापन गरिए पनि पछि परिमार्जन गरी ७.४ कायम गरिएको हो ।
भूकम्पपछि अधिकारीहरूले सुनामीको उच्च जोखिम रहेको भन्दै सतर्कता अपनाउन आग्रह गरेका छन् । हवाईस्थित सुनामी चेतावनी केन्द्रले केन्द्रविन्दुबाट एक हजार किलोमिटर भित्र रहेका इन्डोनेसिया, फिलिपिन्स र मलेसियाका तटीय क्षेत्रहरूमा समुद्री छाल आउन सक्ने सम्भावना रहेको जनाएको छ ।
भग्नावशेषले पुरिएर एक जनाको मृत्यु
स्थानीय खोज तथा उद्धार टोलीका अनुसार भवनको भग्नावशेषले थिचिएर ७० वर्षीया एक महिलाको मृत्यु भएको छ । मृतक उत्तर सुलावेसीको मिनाहासा क्षेत्रकी बासिन्दा हुन् ।
उद्धारकर्मीहरूले सुलावेसी टापुको उत्तरी भागमा रहेको मनाडो शहरमा नराम्ररी क्षतिग्रस्त भएको भवनको दृश्य सार्वजनिक गरेका छन् । भवनभित्रका सामग्री बाहिर छरिएका छन् भने केही संरचनाहरू बाङ्गिएका छन् ।
थप पराकम्पको सम्भावना
मुख्य भूकम्पपछि ५.५ र ५.२ म्याग्निच्युडका दुईवटा पराकम्पहरू महसुस गरिएका छन् । राष्ट्रिय भूगर्भ एजेन्सीले अझै थप पराकम्प आउन सक्ने चेतावनी दिएको छ ।
एजेन्सीका अनुसार केही स्थानमा भवनमा क्षति पुगेको र मानिसहरू घाइते भएको प्रारम्भिक रिपोर्ट प्राप्त भएको छ । सर्वसाधारणलाई तटीय क्षेत्र तथा पहिरोको जोखिम भएका स्थानबाट टाढा रहन र सुरक्षित स्थानमा जान आग्रह गरिएको छ ।
जापानमा पनि सतर्कता
जापानको मौसम विज्ञान एजेन्सीले यस भूकम्पका कारण समुद्री सतहमा सामान्य परिवर्तन हुन सक्ने भन्दै अलर्ट जारी गरेको छ । शिजुओका, ओकिनावा र होक्काइडो क्षेत्रमा यस्तो प्रभाव देखिन सक्ने जनाइएको छ, यद्यपि ठूलो सुनामीको जोखिम भने कम रहेको बताइएको छ ।
जोखिम क्षेत्रमा इन्डोनेसिया
इन्डोनेसिया ‘रिङ अफ फायर’ क्षेत्रमा पर्ने भएकाले यहाँ बारम्बार भूकम्प र ज्वालामुखी गतिविधि हुने गर्छन् ।
सन् २०२२ मा जाभा टापुको सियानजुर क्षेत्रमा गएको ५.६ म्याग्निच्युडको भूकम्पमा कम्तिमा ६०२ जनाको मृत्यु भएको थियो । त्यस्तै सन् २०१८ मा सुलावेसीमा आएको भूकम्प र सुनामीमा ४,३०० भन्दा बढीको ज्यान गएको थियो। सन् २००४ को हिन्द महासागर भूकम्पले पनि ठूलो मानवीय क्षति निम्त्याएको थियो ।
-Recovered@1x_1-1792306880.jpg){kind=logo}
-Recovered@1x_1-1792308710.jpg){kind=logo}
