नवगठित सरकारका अर्थमन्त्री डा. स्वर्णिम वाग्ले भोलि (शुक्रबार) वीरगंज आउने भएका छन् ।
अर्थ मन्त्रालयका अनुसार उहाँ बिहानको जहाजबाट सिमरा विमानस्थल पुग्ने र त्यहाँबाट विभिन्न ठाउँका अनुगमन गर्ने कार्यक्रम तय गरिएको छ । अर्थमन्त्री वाग्लेले आईसीपी, वीरगंज भन्सार कार्यालय तथा ड्राइपोर्ट कार्यालयको अनुगमन गर्ने कार्यक्रम रहेकाे छ । मुलुकको प्रमुख राजस्व संकलन तथा अन्तर्राष्ट्रिय व्यापारको महत्वपूर्ण केन्द्रका रूपमा रहेकाे कार्यालयको सुधार तथा सहजिकरणका विषयमा विशेष ध्यान केन्द्रित गरिने जनाइएको छ ।
अर्थ मन्त्रालयका अनुसार भ्रमणको मुख्य उद्देश्य सीमाक्षेत्रको व्यापारिक अवस्था, राजस्व संकलनको वर्तमान स्थिति, सेवा प्रवाहमा देखिएका समस्या तथा निजी क्षेत्रले भोगिरहेका चुनौतीहरूको जानकारी लिनु रहेको छ । यस क्रममा वीरगंज भन्सार कार्यालय, यहाँका उद्योगी व्यवसायी तथा सरोकारवाला निकायहरूसँग छलफल गरी सुझाव संकलन गरिने कार्यक्रम रहेको छ ।
यसैगरी वीरगंज उद्योग वाणिज्य संघकाे कार्यक्रम, विभिन्न सरोकारवालाहरूले भन्सार प्रक्रियामा हुने ढिलासुस्ती, ढुवानी लागत, नीतिगत अस्पष्टता तथा सीमाक्षेत्रमा देखिने प्राविधिक समस्याहरूका विषयमा अर्थमन्त्रीसमक्ष धारणा राख्ने तयारी रहेको जनाएका छन् ।
नवगठित सरकारमा अर्थतन्त्रको अवस्था, राजस्व वृद्धि, निजी क्षेत्रलाई प्रोत्साहन, लगानीमैत्री वातावरण निर्माण तथा व्यापार सहजीकरणसम्बन्धी सरकारी नीतिबारे अर्थमन्त्री डा. स्वर्णिम वाग्लेले आफ्नो धारणा राख्ने कार्यक्रम रहेको अर्थ मन्त्रालयले जनाएको छ ।
-1772177803.jpg)
