वीरगंज महानगरपालिका अन्तर्गतको आमसञ्चार प्रवर्द्धन तथा नियमन समितिले पूर्णता पाएको छ ।
यसअघि नै वरिष्ठ पत्रकार शत्रुघ्न नेपाल संयोजकमा नियुक्त भइसकेका समितिमा आज थप ११ जना सदस्य मनोनयन भएसँगै समिति पूर्ण बनेको हो ।आज आयोजित एक कार्यक्रममा महानगर प्रमुख राजेशमान सिंहले नवमनोनित सदस्यहरूलाई मनोनयन पत्र हस्तान्तरण गरेका थिए ।
सो अवसरमा बोल्दै प्रमुख सिंहले समितिको पूर्णतासँगै महानगरको सूचना प्रणाली अझ सुदृढ र व्यवस्थित हुने विश्वास व्यक्त गरे । उनले सञ्चार क्षेत्र लोकतन्त्रको महत्वपूर्ण अंग भएकाले यस क्षेत्रसँग सहकार्य र समन्वयलाई उच्च प्राथमिकतामा राखिने बताए ।
समितिमा क्रान्ति साह, अमित साह, लक्ष्मी खरेल, जितेन्द्र साह, कन्हैया प्रसाद कलवार (गुप्ता), विरेन्द्र कुमार साह, निरबहादुर पिठाकोटे, ग्यासु मियाँ देवान, अर्जुन प्रसाद गुप्ता, छेदी राम र मनोज कुमार पटेल सदस्य रहेका छन् ।
समितिको मुख्य दायित्व महानगरपालिका र सञ्चारमाध्यमबीचको सम्बन्ध सुदृढ बनाउने, सूचना प्रवाहलाई पारदर्शी, सहज र समयमै जनतासम्म पुर्याउने तथा आमसञ्चारसँग सम्बन्धित नीति, नियमन र सुधारका विषयमा सुझाव दिने रहेको छ ।
समितिको गठनसँगै वीरगञ्ज महानगरपालिकाले सूचना प्रवाह प्रणालीलाई अझ व्यवस्थित, जवाफदेही र जनमुखी बनाउने अपेक्षा गरिएको छ । साथै, सञ्चार क्षेत्रसँगको सहकार्यलाई संस्थागत गर्दै स्थानीय सरकारका गतिविधिहरूलाई विश्वसनीय र प्रभावकारी रूपमा नागरिकसम्म पुर्याउन समितिले महत्वपूर्ण भूमिका निर्वाह गर्ने विश्वास लिइएको छ ।
