पर्सा प्रहरीले वीरगंजस्थित विभिन्न क्यासिनोमा जुवा खेलिरहेको अवस्थामा ६ भारतीय नागरिकसहित १ नेपालीलाई पक्राउ गरेको छ ।
जिल्ला प्रहरी कार्यालय पर्साका अनुसार शनिबार राति करिब ११:४५ बजे वीरगंजका चार वटा क्यासिनोमा शंकास्पद गतिविधि भइरहेको विशेष सूचनाको आधारमा वडा प्रहरी कार्यालय बिर्ताबाट खटिएको संयुक्त प्रहरी टोलीले छापा मारेको हो ।
प्रहरीले किङ क्यासिनो, फर्चुन सिटी गेमिङ क्लब र क्यासिनो माजोङलगायत स्थानबाट उनीहरूलाई जुवा खेलिरहेको अवस्थामा नियन्त्रणमा लिएको जनाएको छ ।
पक्राउ पर्नेहरूमा भारत बिहारका २६ वर्षीय गणेश कुमार, ३८ वर्षीय सन्दीप कुमार, ३१ वर्षीय सुरज प्रसाद, ४३ वर्षीय अल्लाह यादव र ३६ वर्षीय ओमप्रकाश यादव रहेका छन् । त्यसैगरी वीरगंज महानगरपालिका–३२ निवासी ३७ वर्षीय जमुदिन मियाँ अन्सारी पनि पक्राउ परेका छन् ।
प्रहरीले उनीहरूको साथबाट ५ सय रुपैयाँ बराबरको क्यासिनो क्वाइन, नेपाली रुपैयाँ ५ सय ५५, भारतीय रुपैयाँ १ हजार २ सय तथा दुई वटा मोबाइल फोन बरामद गरेको जनाएको छ।
पक्राउ परेकाहरूमाथि आवश्यक अनुसन्धान तथा कानुनी कारबाही प्रक्रिया अघि बढाइएको छ । जिल्ला प्रहरी कार्यालय पर्साका सूचना अधिकारी तथा प्रहरी नायब उपरीक्षक हरिबहादुर बस्नेतले घटनाबारे थप अनुसन्धान भइरहेको जानकारी दिएका छन् ।
