सर्लाही क्षेत्र नम्बर १ की सांसद नितिमा कार्कीले संसद्मा आफ्नो निर्वाचन क्षेत्रका जनजीवनसँग प्रत्यक्ष जोडिएका गम्भीर समस्याहरूमाथि सरकारको ध्यानाकर्षण गराएकी छन् ।
बिहीबार संसद्मा बोल्दै उनले विशेषगरी सर्पदंश उपचार केन्द्रमा दक्ष जनशक्तिको अभाव, दुर्गम बस्तीमा सडक तथा सञ्चार पहुँचको कमी, स्वास्थ्य सेवाको कमजोर अवस्था तथा नीलगाईले बालीनाली नष्ट गर्ने समस्या समाधानका लागि सरकारसँग जोडदार माग गरिन् ।
सांसद कार्कीले गर्मीयाम सुरु भएसँगै तराई क्षेत्रमा सर्पदंशका घटना बढ्ने गरेको उल्लेख गर्दै सर्लाहीको लालबन्दी नगरपालिका–१, नवलपुरस्थित समुदायस्तरबाट सञ्चालित सर्पदंश उपचार केन्द्रको महत्वपूर्ण भूमिकाबारे चर्चा गरिन् । उक्त केन्द्रले सर्लाहीसहित रौतहट, महोत्तरीलगायत आसपासका जिल्लाका हजारौँ नागरिकलाई सेवा दिँदै आएको उनले बताइन् ।
तर, केन्द्रमा आईसीयू र भेन्टिलेटरजस्ता पूर्वाधार भए पनि दक्ष जनशक्तिको अभावका कारण गम्भीर बिरामीको उपचारमा कठिनाइ भइरहेको भन्दै उनले चिन्ता व्यक्त गरिन् । विशेषगरी साना बालबालिकाको उपचारमा जटिलता आउने गरेको र हालै २ वर्षीया बालिका आशाकुमारी महतो विषालु कोब्राको टोकाइबाट गम्भीर अवस्थामा पुगेको घटनालाई उनले उदाहरणका रूपमा प्रस्तुत गरिन् ।
सांसद कार्कीले स्थानीय तथा प्रदेश सरकारलाई पटक–पटक आग्रह गर्दा पनि समस्या समाधान नभएको भन्दै सभामुखमार्फत सरकारसँग तत्काल सर्पदंश उपचार केन्द्रमा विशेषज्ञ चिकित्सक, आईसीयू सञ्चालनका लागि दक्ष जनशक्ति, भेन्टिलेटर सेवा तथा आवश्यक स्वास्थ्य उपकरण उपलब्ध गराउन माग गरिन् ।
उनले सर्लाहीको लालबन्दी नगरपालिका–१४ मा सर्पदंशकै कारण एक युवाको ज्यान गएको दुखद घटना पनि सदनमा प्रस्तुत गरिन् । सडक पहुँच र सञ्चार सुविधाको अभावका कारण समयमै उपचार नपुग्दा समस्या झन् गम्भीर बनेको उनले बताइन् ।
लालबन्दीबाट उक्त बस्तीमा पुग्न करिब दुई घण्टाभन्दा बढी समय लाग्ने र वर्षायाममा तीन–तीन महिनासम्म नागरिक सम्पर्कविहीन हुने अवस्था रहेको भन्दै उनले दुर्गम भौगोलिक अवस्थाप्रति राज्यको ध्यान नपुगेको आरोप लगाइन् ।
सांसद कार्कीले पूर्व–पश्चिम राजमार्ग क्षेत्र भए पनि सर्लाही क्षेत्र नम्बर १ मा सुविधा सम्पन्न अस्पताल नहुँदा दुर्घटना तथा गम्भीर बिरामीलाई अन्य जिल्लामा रेफर गर्नुपर्ने बाध्यता रहेको बताइन् । यस्तो अवस्थामा ट्रमा सेन्टर स्थापना अत्यावश्यक भइसकेको उनको भनाइ थियो ।
उनले लालबन्दीमा डब्लूएचओ मापदण्डअनुसार निर्माण भएको भवनलाई तत्काल ट्रमा सेन्टरका रूपमा सञ्चालनमा ल्याउन सरकारसँग माग गरिन् ।
अन्त्यमा, सांसद कार्कीले किसानले दुःख गरेर लगाएको बाली नीलगाईले नष्ट गर्दा कृषकहरू निराश बनेको भन्दै यसको दीर्घकालीन समाधानका लागि पनि सरकार गम्भीर हुनुपर्ने आवश्यकता औंल्याइन् ।
