बिहारमा प्री-मानसुन प्रणाली सक्रिय बनेसँगै मौसम विभागले राज्यका सबै ३८ जिल्लामा आँधी–बारिसको अलर्ट जारी गरेको छ ।
बंगालको खाडीबाट आएको आर्द्र हावासँगै बनेको मौसमी प्रणालीका कारण प्रदेशभर मौसम अस्थिर बनेको हो । मौसम विभागका अनुसार १६ जिल्लामा भीषण आँधीको ‘अरेन्ज अलर्ट’ जारी गरिएको छ, जहाँ हावाको गति ४० देखि ६० किलोमिटर प्रतिघण्टासम्म पुग्न सक्ने अनुमान गरिएको छ । बाँकी २२ जिल्लामा ‘यलो अलर्ट’ जारी गरिएको छ, जहाँ मध्यमदेखि तीव्र वर्षासहित हावाहुरी चल्ने सम्भावना छ ।
अरेन्ज अलर्ट जारी गरिएका १६ जिल्ला
उत्तर र पश्चिम बिहारका पश्चिम चम्पारण, पूर्वी चम्पारण, गोपालगन्ज, सीवान, सारण, दक्षिण तथा मध्य बिहारका भोजपुर, बक्सर, कैमूर, रोहतास, अरवल, औरंगाबाद तथा पूर्वी बिहारका खगडिया, मुंगेर, भागलपुर, बाँका र जमुईमा बढी जोखिम रहने बताइएको छ ।
मौसम अवस्था र तापक्रम
पछिल्ला दिनहरूमा बिहारको मौसममा तीव्र परिवर्तन देखिएको छ । शुक्रवार भभुआ (कैमूर) मा ४१.३ डिग्री सेल्सियस तापक्रमसहित राज्यकै सबैभन्दा गर्म स्थान बनेको छ । डेहरीमा ४०.६ डिग्री र राजधानी पटना मा ३७.१ डिग्री सेल्सियस तापक्रम मापन गरिएको छ । वाल्मीकिनगरमा भने न्यूनतम तापक्रम २४ डिग्री सेल्सियस रहेको छ । मौसमविद्हरूका अनुसार आगामी २–३ दिनसम्म तापक्रममा ठूलो परिवर्तन हुने सम्भावना कम छ, तर प्री-मानसुन गतिविधि अझै सक्रिय रहनेछ ।
यस वर्ष चाँडै मनसुन आउने अनुमान
मौसम विभागले यस वर्ष मनसुन सामान्य समयभन्दा केही चाँडै बिहार पुग्न सक्ने जनाएको छ । सामान्यतया जुन १२ देखि १५ बीच मनसुन बिहार प्रवेश गर्छ, तर यस वर्ष जुन ८ देखि १० बीच पुग्ने सम्भावना रहेको बताइएको छ। केरलामा मनसुन मे २६ आसपास प्रवेश गर्ने पूर्वानुमानका आधारमा यो अनुमान गरिएको हो ।
सावधानी अपनाउन आग्रह
मौसम विभागले नागरिकलाई खराब मौसमका बेला विशेष सावधानी अपनाउन आग्रह गरेको छ । खुला ठाउँमा नबस्ने, रुख, बिजुलीका पोल तथा होर्डिङबोर्डमुनि नबस्ने, किसानहरूले खेतको काम तुरुन्त रोक्ने र इलेक्ट्रोनिक उपकरण सुरक्षित रूपमा प्रयोग गर्ने सुझाव दिइएको छ ।
विभागले आकाशीय बिजुली (वज्रपात) को जोखिम उच्च रहने भएकाले सुरक्षित स्थानमा बस्न विशेष आग्रह गरेको छ ।
