सशस्त्र प्रहरी बल नेपाल नं. १३ गण हेडक्वार्टर, पर्साको आयोजनामा “सीमावासीसँग सशस्त्र प्रहरी” कार्यक्रम अन्तर्गत वीरगंज महानगरपालिका–१, बजार छपकैयामा निश्शुल्क आँखा शिविर सम्पन्न भएको छ ।
सीमावर्ती क्षेत्रमा बसोबास गर्ने विपन्न तथा सीमान्तकृत समुदायलाई लक्षित गरी सञ्चालन गरिएको शिविरमा विशेषज्ञ चिकित्सकद्वारा आँखा परीक्षण, परामर्श तथा उपचार सेवा प्रदान गरिएको थियो ।
शिविर तिलगङ्गा आँखा अस्पताल र सामुदायिक आँखा केन्द्र, वीरगंजको प्राविधिक सहयोगमा सम्पन्न भएको हो । कार्यक्रमको सहजीकरण सशस्त्र प्रहरी बल नेपाल बोर्डर आउट पोस्ट (बीओपी) श्रीसियाले गरेको थियो । शिविरमा मोतीबिन्दु पहिचान कार्यक्रमसमेत सञ्चालन गरिएको थियो ।
कार्यक्रमका प्रमुख अतिथि सशस्त्र प्रहरी बल नेपाल नं. १३ गण हेडक्वार्टर, पर्साका गणपति मोहनबहादुर क्षेत्री रहेका थिए । कार्यक्रममा बीओपी श्रीसियाका प्रहरी निरीक्षक समराज खड्का, स्वास्थ्य संयोजक महेशसिंह धामी तथा छपकैयाका वरिष्ठ प्रहरी नेत्र राणालगायतको सहभागिता थियो ।
आयोजकका अनुसार शिविरमा कुल २११ जनाको आँखा परीक्षण गरिएको थियो । परीक्षणका क्रममा ३४ जनामा मोतीबिन्दुको समस्या पहिचान भएको छ । ती बिरामीहरूको तिलगङ्गा आँखा अस्पतालमार्फत निश्शुल्क शल्यक्रिया गरिने जानकारी दिइएको छ । साथै अन्य सेवाग्राहीलाई आवश्यक औषधि वितरण गरिएको थियो ।
कार्यक्रममा आयोजकले सीमावर्ती क्षेत्रका नागरिकलाई आधारभूत स्वास्थ्य सेवामा सहज पहुँच पुर्याउने उद्देश्यले यस्ता सामाजिक तथा स्वास्थ्यसम्बन्धी कार्यक्रमलाई निरन्तरता दिइने बताएका छन् ।
स्थानीय बासिन्दाले विशेषज्ञ चिकित्सकबाट निश्शुल्क सेवा पाउँदा खुशी व्यक्त गर्दै यस्ता कार्यक्रम ग्रामीण तथा सीमान्तकृत समुदायका लागि अत्यन्त प्रभावकारी हुने प्रतिक्रिया दिएका छन् ।
