वीरगंज महानगरपालिकाका कार्यवाहक प्रमुख इम्तियाज आलमको पहलमा विगत करिब ६ महिनादेखि रोकिएको विपद् राहत रकम वितरण प्रक्रिया अघि बढाइएको छ । महानगरका विभिन्न वडाका आगलागी, बाढी तथा हावाहुरीबाट प्रभावित १५ परिवारलाई राहत उपलब्ध गराउने तयारी गरिएको महानगरपालिकाले जनाएको छ ।
महानगरपालिकाका अनुसार कार्यवाहक प्रमुख आलमले विपद् व्यवस्थापन शाखामा प्राप्त निवेदनहरूप्रति तत्काल चासो दिँदै आवश्यक छानबिन गरी वास्तविक पीडितलाई राहत उपलब्ध गराउन निर्देशन दिएका थिए । सोही निर्देशनअनुसार वडा नम्बर १४, १७, १९ र २६ लगायतका क्षेत्रमा प्राकृतिक विपद्का कारण भौतिक क्षति बेहोरेका परिवारहरूको पहिचान गरिएको हो ।
पीडितहरूको निवेदन तथा क्षतिको विवरणका आधारमा प्रतिपरिवार ५ हजारदेखि २५ हजार रुपैयाँसम्म राहत उपलब्ध गराउने निर्णय गरिएको छ । यससँगै लामो समयदेखि राहतको प्रतीक्षामा रहेका प्रभावित परिवारले राहत पाउने भएका छन् ।
विपद् व्यवस्थापन शाखा प्रमुख विभा मिश्राका अनुसार कार्यवाहक प्रमुख आलमको सक्रिय समन्वय र निर्देशनका कारण लामो समयदेखि रोकिएको प्रशासनिक प्रक्रिया छिटो सम्पन्न भएको हो । उनका अनुसार राहत रकम आगामी केही दिनभित्र सम्बन्धित पीडित परिवारलाई वितरण गरिनेछ ।
कार्यवाहक प्रमुख आलमले विपद्बाट प्रभावित नागरिकलाई आवश्यक सहयोग उपलब्ध गराउनु महानगरपालिकाको दायित्व भएको उल्लेख गर्दै आगामी दिनमा पनि संकटमा परेका नगरवासीलाई शीघ्र, प्रभावकारी र पारदर्शी रूपमा सहयोग उपलब्ध गराइने प्रतिबद्धता व्यक्त गरेका छन् ।
