पर्साको पोखरिया नगरपालिकामा अपाङ्गता परिचयपत्रको विवरण हेरफेर गरी सामाजिक सुरक्षा भत्ता अनियमित रूपमा लिएको आरोपमा अख्तियार दुरुपयोग अनुसन्धान आयोगले तीन जनाविरुद्ध भ्रष्टाचार मुद्दा दायर गरेको छ ।
अख्तियारले पोखरिया नगरपालिकाका तत्कालीन अधिकृत छैटौं तहका सञ्जय कुमार पाण्डेय, अपाङ्ग शाखाका तत्कालीन कर्मचारी अम्बिका महतो खुलवट र पोखरिया–१० का महेन्द्र राउत कुर्मी विरुद्ध विशेष अदालत काठमाडौंमा आरोपपत्र दायर गरेको हो ।
आयोगका अनुसार कुर्मीलाई स्वास्थ्य परीक्षण प्रतिवेदनका आधारमा २०७८ असोज ११ गते अपाङ्गता समन्वय समितिले ‘Y (ग)’ श्रेणीको परिचयपत्र दिएको थियो । उक्त श्रेणीका व्यक्तिले सामाजिक सुरक्षा भत्ता पाउने व्यवस्था नभए पनि कर्मचारीसँगको मिलेमतोमा सरकारी अभिलेखमा रहेको विवरण सच्याई उनलाई ‘Red (क)’ श्रेणीको परिचयपत्र उपलब्ध गराइएको आरोप छ ।
परिचयपत्रको विवरण परिवर्तन गरी सामाजिक सुरक्षा भत्ता पाउने अवस्था सिर्जना गराएर कुर्मीले सरकारी स्रोतबाट १ लाख ९१ हजार ५२० रुपैयाँ बराबरको रकम अनियमित रूपमा लिएको अख्तियारको दाबी छ । अख्तियारले तीनै जनाविरुद्ध भ्रष्टाचार निवारण ऐन, २०५९ अनुसार बिगो बराबरको रकम असुल, सोही बराबर जरिवाना तथा कैद सजायको माग गरेको छ ।
आयोगका अनुसार कर्मचारीद्वयमाथि सरकारी लिखत सच्याउने र भ्रष्टाचारसम्बन्धी कसुरमा मुद्दा चलाइएको छ भने कुर्मीलाई उक्त कार्यमा सहयोग गर्ने मतियारको रूपमा आरोप लगाइएको छ ।
