वीरगंजको ऐतिहासिक तथा धार्मिक आस्थाको केन्द्र श्री गहवामाई मन्दिरको ‘माई विशाल रथ यात्रा’लाई भव्य, सभ्य र व्यवस्थित रूपमा सम्पन्न गर्न स्थानीय प्रशासन, सुरक्षा निकाय र सरोकारवाला संस्थाहरूले तयारी तीव्र पारेका छन् ।
आगामी असार ३२ गते आयोजना हुने रथ यात्राको व्यवस्थापनलाई प्रभावकारी बनाउन वीरगंज महानगरपालिकाका कार्यवाहक नगर प्रमुख इम्तियाज आलमको अध्यक्षतामा महानगरको सभाहलमा उच्चस्तरीय समन्वय बैठक सम्पन्न भएको हो ।
बैठकमा वीरगंज महानगरपालिका, जिल्ला प्रशासन कार्यालय, नेपाल प्रहरी, सशस्त्र प्रहरी बल, नेपाली सेना, नेपाल विद्युत प्राधिकरण, नेपाल टेलिकम, आयोजक समिति तथा अन्य सरोकारवाला निकायका प्रतिनिधिहरूको सहभागिता रहेको थियो ।
रथ यात्राको रुट, सहभागी हुने श्रद्धालुको सम्भावित भीड तथा धार्मिक संवेदनशीलतालाई ध्यानमा राख्दै बैठकले व्यवस्थापनका विभिन्न पक्षमा जिम्मेवारी बाँडफाँड गरेको छ ।
बैठकको निर्णयअनुसार रथ यात्राको सम्पूर्ण सुरक्षा व्यवस्थापन जिल्ला प्रशासन कार्यालयको समन्वयमा नेपाल प्रहरी, सशस्त्र प्रहरी बल, नेपाली सेना र नगर प्रहरीको संयुक्त परिचालनमार्फत गरिनेछ । रथ यात्रा व्यवस्थापन समितिले सुरक्षा निकायसँग समन्वय गर्दै यात्रा मार्गमा शान्ति, सुरक्षा र ट्राफिक व्यवस्थापनलाई प्रभावकारी बनाउनेछ ।
यात्रा अवधिभर मार्गलाई स्वच्छ राख्न वीरगंज महानगरपालिकाले आवश्यक जनशक्ति तथा उपकरण परिचालन गर्ने भएको छ । यस अभियानमा निजी क्षेत्र, आयोजक समिति र स्थानीय सामाजिक संघसंस्थाहरूको समेत सहकार्य रहनेछ । श्रद्धालुहरूको सुविधालाई ध्यानमा राख्दै यात्रा मार्गका विभिन्न स्थानमा शुद्ध खानेपानी वितरणको व्यवस्था मिलाइने भएको छ । खानेपानी संस्थान, निजी क्षेत्र तथा अन्य सरोकारवाला संस्थाहरूको समन्वयमा आवश्यक प्रबन्ध गरिने निर्णय भएको छ ।
रथ यात्राका क्रममा विद्युत सेवा अवरुद्ध नहोस् भन्ने उद्देश्यले नेपाल विद्युत प्राधिकरणलाई विशेष जिम्मेवारी दिइएको छ। यात्रा मार्गमा विद्युत वितरण प्रणालीको मर्मत, निरीक्षण तथा निरन्तर निगरानी गरिने जनाइएको छ ।
त्यसैगरी, भीडभाडका कारण सञ्चार सेवा प्रभावित हुन सक्ने अवस्थालाई ध्यानमा राख्दै नेपाल टेलिकमलगायत दूरसञ्चार सेवा प्रदायकलाई मोबाइल नेटवर्क तथा सञ्चार सेवा सुदृढ बनाउन निर्देशन दिइएको छ ।
धार्मिक मर्यादा, पवित्रता तथा स्वच्छता कायम राख्ने जिम्मेवारी भने आयोजक समितिले प्रत्यक्ष रूपमा सम्हाल्ने निर्णय गरिएको छ । बैठकलाई सम्बोधन गर्दै कार्यवाहक नगर प्रमुख इम्तियाज आलमले गहवामाई रथ यात्रा वीरगंज मात्र नभई सम्पूर्ण मधेश प्रदेशको धार्मिक तथा सांस्कृतिक पहिचानसँग जोडिएको महत्वपूर्ण उत्सव भएको उल्लेख गर्दै यसको सफल आयोजनाका लागि महानगरपालिकाले आवश्यक सबै सहयोग उपलब्ध गराउने प्रतिबद्धता व्यक्त गरे ।
उनले सम्बन्धित सबै सरकारी तथा गैरसरकारी निकायलाई तोकिएको जिम्मेवारी समयमै र प्रभावकारी रूपमा पूरा गर्न निर्देशनसमेत दिएका छन् ।
रथ यात्रा व्यवस्थापन समितिले पनि धार्मिक उत्सवलाई मर्यादित, सुरक्षित र सफल बनाउन वीरगंजबासी, उद्योगी–व्यवसायी, सामाजिक संघसंस्था तथा सञ्चारकर्मीहरूलाई सक्रिय सहयोगका लागि आग्रह गरेको छ ।
