पछिल्लो दुई दिनदेखि भइरहेको अविरल वर्षासँगै सप्तरी जिल्लाका विभिन्न नदी तथा खोलामा पानीको बहाव बढ्दा बाढी, डुबान तथा कटानको जोखिम बढेको छ ।
जिल्लाका विभिन्न स्थानमा पुल, तटबन्ध तथा खेतीयोग्य जमिनमा क्षति पुगेको छ । जिल्लाको कञ्चनरूप नगरपालिका–११ गिदहास्थित देवीखोला र बाभना खोलाको संगम क्षेत्रमा रहेको पुलमा वर्षाका कारण क्षति पुगेको स्थानीय रामस्वरूप चौधरीले जानकारी दिनुभयो । पुलमा आएको क्षतिका कारण स्थानीयवासीलाई आवतजावतमा समस्या हुन थालेको छ ।
यसैगरी, राजविराज नगरपालिका–११ झलहीस्थित कोशी पम्प नहरको तटबन्ध भत्किँदा रोपिएको धानबालीमा क्षति पुगेको छ भने बिघौँ खेतीयोग्य जमिन डुबानमा परेको छ। स्थानीय देवकुमार यादवका अनुसार कोशी पश्चिम नहरबाट जिल्लाको उत्तरी भेगमा सिँचाइ सुविधा उपलब्ध गराउने उद्देश्यले सञ्चालन गरिएको पम्प नहरको तटबन्ध भत्किएपछि पानीसँगै ठूलो परिमाणमा बालुवा खेतमा पसेको हो । तटबन्ध फुटेपछि पश्चिमतर्फ रहेका करिब दुई बिघाभन्दा बढी क्षेत्रफलमा रोपिएको धानबाली बालुवाले पुरिएको छ भने खाली रहेका खेतमा समेत बालुवा जमेको उहाँले बताउनुभयो ।
स्थानीय किसान नन्दलाल यादवले तटबन्धको नियमित मर्मतसम्भार नगर्दा यस्तो अवस्था सिर्जना भएको बताउनुभयो । समयमै कमजोर संरचनाको मर्मत गरिएको भए धानबाली तथा खेतीयोग्य जमिनमा यति ठूलो क्षति नपुग्ने उहाँको गुनासो छ । प्रभावित स्थानीयवासीले तटबन्ध तत्काल मर्मत गरी पानीको बहाव नियन्त्रण गर्न तथा उत्तरी क्षेत्रको सिँचाइ सेवा पुनः सञ्चालनको व्यवस्था मिलाउन सम्बन्धित निकायसँग माग गरेका छन् ।
यसैबीच, स्थानीय कमल मण्डलका अनुसार सोमबार बिहान हनुमाननगर कंकालिनी नगरपालिका–११ सखुवास्थित सामुदायिक भवन अगाडि रहेको बाँधमा कटान सुरु भएको छ। कटान तीव्र बन्दै गएपछि आसपासका बस्ती डुबानमा पर्ने जोखिम बढेको उहाँले बताउनुभयो । उहाँका अनुसार इनरुवा र हनुमाननगर क्षेत्रबाट आएको पानीको भेल ह्युमपाइपले थेग्न नसक्दा बाँध कटान सुरु भएको हो ।
यता, सप्तरीका प्रमुख जिल्ला अधिकारी श्यामकृष्ण थापाले जिल्लास्थित खाँडो, महुली, कोशी, त्रियुगा लगायतका नदी तथा खोलामा पानीको बहाव बढेको जानकारी दिनुभयो । उहाँका अनुसार विभिन्न गाउँबस्तीमा पानी पसेको छ भने बाढी, डुबान र कटानको अवस्थाको निरन्तर अनुगमन भइरहेको छ ।
सम्भावित जोखिमलाई मध्यनजर गर्दै स्थानीय तह, सुरक्षा निकाय तथा सम्बन्धित निकायसँग समन्वय गरी आवश्यक उद्धार, राहत तथा सुरक्षित बसोबासको व्यवस्थापनका लागि तयारी गरिएको प्रमुख जिल्ला अधिकारी थापाले बताउनुभयो ।
