पर्साको कालिकामाई गाउँपालिका–३ का वडाध्यक्ष संजय पटेललाई प्रहरीले नियन्त्रणमा लिएको छ । गाउँपालिकाका कर्मचारीमाथि कुटपिट तथा दुर्व्यवहार गरेको आरोपमा प्रहरीले उनलाई पक्राउ गरेको हो ।
इलाका प्रहरी कार्यालय पोखरियाको टोलीले वडाध्यक्ष पटेललाई उनकै गाउँ कालिकामाई गाउँपालिका–३, हरिहरपुर विर्ताबाट नियन्त्रणमा लिएको हो । प्रहरीका अनुसार गाउँपालिकाका एक कर्मचारीमाथि कार्यालयभित्रै कुटपिट भएको घटनामा अभद्र व्यवहारसम्बन्धी मुद्दामा उनलाई पक्राउ गरिएको हो ।
घटनामा संलग्न अन्य आरोपितहरूको खोजी भइरहेको प्रहरीले जनाएको छ । यस घटनाको विरोधमा कालिकामाई गाउँपालिकाका सम्पूर्ण कर्मचारीले दोषीमाथि कानुनी कारबाहीको माग गर्दै आन्दोलनसमेत गरेका थिए ।
गत असार २३ गते गाउँपालिकाका कम्प्युटर अपरेटर चन्दनकुमार चौरसियामाथि गाउँ कार्यपालिकाको कार्यालयभित्रै कुटपिट तथा दुर्व्यवहार भएको थियो । कार्यालय समयमा आफ्नो जिम्मेवारी निर्वाह गरिरहेका कर्मचारीमाथि योजनाबद्ध रूपमा आक्रमण गरिएको भन्दै कर्मचारीहरूले दोषीमाथि कानुनी कारबाहीको माग गरेका थिए ।
सोही घटनाको अनुसन्धानका क्रममा प्रहरीले वडाध्यक्ष पटेललाई पक्राउ गरेको हो । उनलाई आवश्यक कानुनी प्रक्रियाका लागि जिल्ला प्रशासन कार्यालयमा उपस्थित गराउने तयारी भइरहेको प्रहरीले जनाएको छ ।
