रसुवा जिल्लामा आएको बाढी तथा पहिरोपछि पर्साबाट रोजगारी तथा व्यवसायका सिलसिलामा रसुवा पुगेका १६ जना व्यक्ति सम्पर्कविहीन मध्ये २ जना सम्पर्कमा आएको जिल्ला प्रहरी कार्यालय पर्साले जनाएको छ ।
जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक (डीएसपी) चक्र मल्लका अनुसार रसुवामा आएको प्राकृतिक विपत्तिपछि पर्सा घर भएका तथा पर्सामा बसोबास गर्दै आएका १६ जना व्यक्तिसँग सम्पर्क हुन नसकेको भन्दै निवेदन लिएर आएको थियो त्यसमध्ये २ जना हेड क्वाटरको सम्पर्कमा आएको प्रहरी नायब उपरिक्षक मल्लले बताए । अन्य सम्पर्कविहीन भएकाहरूको खोजी तथा अवस्थाबारे जानकारी संकलन भइरहेको प्रहरीले जनाएको छ ।
सम्पर्कविहीनमध्ये वीरगञ्ज महानगरपालिका–१२, मुर्ली नाइका टोल निवासी कमरुल अन्सारी र वीरगञ्ज–१३, मुर्ली नाइका टोल निवासी श्याम बाबु ठाकुर रहेका छन् । यस्तै, पर्साको ठोरी गाउँपालिका–४ स्थायी घर भई रसुवा भन्सार कार्यालयमा भन्सार एजेन्टका रूपमा कार्यरत विशाल तिमिल्सिना पनि बिहीबार बिहान रसुवा भन्सार कार्यालय, टिमुरेबाट सम्पर्कविहीन भएको प्रहरीले जनाएको छ ।
वीरगञ्ज महानगरपालिका–१५, भिस्वा घर भएका सुनिलमान डंगोल पनि रसुवा नाकाबाट गाडी पास गराएर एक/दुई दिनमा घर फर्किने बताएको भएपनि हालसम्म परिवारको सम्पर्कमा नआएको जनाइएको छ ।
त्यस्तै, रसुवामा आएको बाढी तथा पहिरोपछि वीरगञ्ज–उदयपुरघुर्मी क्षेत्रका एक ट्रक चालक पनि सम्पर्कविहीन भएको बताइएको छ । उनीबारे कुनै जानकारी प्राप्त भए परिवार वा सम्बन्धित व्यक्तिलाई खबर गरिदिन आग्रह गरिएको छ ।
प्रहरीका अनुसार सम्पर्कविहीन हुनेमा वीरगञ्ज महानगरपालिका–१४, बहुअरीका नारायण पटेल, परवानीपुर गाउँपालिका–४, चैनपुर, बाराका समिम देवान, वीरगञ्ज–४, बिर्ताका अनुतमबहादुर श्रेष्ठ, हेटौँडा–११ बस्तिपुर मकवानपुरका अभिषेक बस्तोला र घनश्याम बस्तोला तथा निजगढ, बाराका दिनेश परियारलगायत छन् । उनीहरू केही समयदेखि पर्सामा बसोबास गर्दै आएको बताइएको छ ।
यसैबीच, ठोरी गाउँपालिका–३ नयाँबस्ती निवासी धनराज घलान पनि रसुवामा पहिरोपछि सम्पर्कविहीन भएका छन् । घलान रोजगारीको सिलसिलामा रसुवाको मैलुङस्थित २१६ मेगावाट क्षमताको जलविद्युत् आयोजनामा क्रेन अपरेटरका रूपमा कार्यरत रहेको परिवारले जनाएको छ ।
परिवारका अनुसार धनराजसँग भदौ १० गते दिउँसो करिब १ बजेसम्म आमासँग सम्पर्क भएको थियो । त्यसपछि भने उनको मोबाइल सम्पर्क हुन नसकेको र हालसम्म कुनै जानकारी प्राप्त नभएपछि परिवार चिन्तित बनेको छ ।
रसुवामा बाढी, पहिरो तथा अन्य प्राकृतिक विपत्तिका कारण सडक तथा सञ्चार सम्पर्क प्रभावित भएपछि त्यहाँ रहेका पर्साका व्यक्तिहरूसँग सम्पर्क हुन नसकेको हुनसक्ने प्रहरीले जनाएको छ। सम्पर्कविहीन व्यक्तिहरूको खोजी तथा उनीहरूको अवस्थाबारे यकिन गर्ने कार्य भइरहेको डीएसपी मल्लले बताए ।
प्राकृतिक विपत्तिका कारण आफन्त तथा परिवारसँग सम्पर्कविहीन भएका व्यक्तिबारे कुनै जानकारी प्राप्त भए तत्काल प्रहरी वा सम्बन्धित परिवारलाई खबर गर्न आग्रह गरिएको छ । साथै, सम्पर्कविहीन व्यक्तिहरूको खोजीमा सहयोग पुग्ने उद्देश्यले उनीहरूको विवरण तथा तस्बिरसहितको सूचना सामाजिक सञ्जालमार्फत व्यापक रूपमा सेयर गर्न परिवारजनले अपिल गरेका छन् ।
