रसुवाको भोटेकोशीमा आएको विनाशकारी बाढीमा परी मधेस प्रदेशका विभिन्न जिल्लाका १ सय ९२ जना सम्पर्कविहीन भएकामा ३० जना परिवारको सम्पर्कमा आएका छन् ।
अझै १ सय ६२ जनाको अवस्था अज्ञात रहेको मधेस प्रदेश प्रहरीले जनाएको छ । मधेस प्रदेश प्रहरी कार्यालयका प्रवक्ता एवं प्रहरी वरिष्ठ उपरीक्षक (एसएसपी) प्रभ प्रसाद ढकालका अनुसार परिवारका सदस्यले खोजतलासका लागि दिएको निवेदनका आधारमा उक्त तथ्यांक संकलन गरिएको हो ।
प्रहरीका अनुसार सप्तरीका ४९ जना सम्पर्कविहीन भएकामा एक जना परिवारको सम्पर्कमा आएका छन् भने ४८ जनाको अवस्था अझै अज्ञात छ । सिरहाबाट १० जना बेपत्ता भएकामा दुई जना सम्पर्कमा आएका छन् भने आठ जना अझै सम्पर्कविहीन छन् । धनुषाबाट १३ जना सम्पर्कविहीन भएकोमा सात जना परिवारको सम्पर्कमा आएका छन् भने छ जनाको अवस्था अज्ञात रहेको प्रहरीले जनाएको छ । महोत्तरीका १७ जना बेपत्ता भएकामा सात जना सम्पर्कमा आए पनि १० जनाको अवस्था अझै थाहा हुन सकेको छैन ।
त्यस्तै, सर्लाहीबाट १९ जना सम्पर्कविहीन भएकामा तीन जना परिवारको सम्पर्कमा आएका छन् भने १६ जना अझै बेपत्ता छन् । रौतहटबाट हराएका १९ जनामध्ये तीन जना सम्पर्कमा आएका छन् भने १६ जनाको अवस्था अज्ञात छ । बाराबाट २५ जना सम्पर्कविहीन भएकामा दुई जना परिवारको सम्पर्कमा आएका छन् भने २३ जनाको अवस्था अझै अज्ञात रहेको प्रहरीको तथ्यांकमा उल्लेख छ । पर्साबाट ४० जना सम्पर्कविहीन भएकामा दुई जना सम्पर्कमा आएका छन् भने ३८ जनाको अवस्था अझै थाहा हुन सकेको छैन ।
यसैगरी, नेपाल प्रहरीमा कार्यरत मधेसका नौ जना पनि उक्त घटनापछि सम्पर्कविहीन भएका थिए । तीमध्ये छ जना सम्पर्कमा आइसकेका छन् भने तीन जनाको अवस्था अझै अज्ञात छ । नेपाली सेनामा कार्यरत तीन जनामध्ये एक जना सम्पर्कमा आएका छन् भने दुई जना अझै सम्पर्कविहीन रहेको प्रहरीले जनाएको छ ।
प्रहरीका अनुसार सम्पर्कविहीन भएकामध्ये अधिकांश रसुवा, धादिङ र नुवाकोटलगायतका जिल्लामा रहेका हाइड्रोपावर आयोजनामा कार्यरत थिए । बाढीपछि उनीहरू हाइड्रोपावरका सुरुङ तथा अन्य संरचनामा फसेको हुनसक्ने आशंका परिवारजनले गरेका छन् । भदौ १० गते रसुवाको भोटेकोशीमा आएको विनाशकारी बाढीपछि मधेसका विभिन्न जिल्लाबाट रोजगारी, व्यापार–व्यवसाय तथा अन्य कामका सिलसिलामा रसुवा, धादिङ र नुवाकोट पुगेका व्यक्तिहरू सम्पर्कविहीन भएका हुन् । उनीहरूको खोजीका लागि परिवारका सदस्यहरूले सम्बन्धित प्रहरी कार्यालयमा निवेदन दिएका छन् ।
मधेस प्रदेश प्रहरी कार्यालयले सम्पर्कविहीन व्यक्तिहरूको खोजतलासका लागि प्रभावित जिल्लाका प्रहरी कार्यालयसँग समन्वय गरी आवश्यक पहल भइरहेको जनाएको छ । साथै, आफ्ना आफन्त उक्त घटनापछि हराएको वा सम्पर्कविहीन भएको भए नजिकको इलाका प्रहरी कार्यालय वा प्रहरी चौकीमा विवरणसहित निवेदन दिन प्रहरीले आग्रह गरेको छ ।
-1788077612.jpg)
