वीरगंज महानगरपालिकाको मुख्य सडक विस्तारको बाँकी काम एक साताभित्र सम्पन्न गर्ने लक्ष्यसहित कामलाई तीव्रता दिइएको छ । सडक डिभिजन कार्यालय हेटौंडाका इन्जिनियर तथा वीरगंजका लागि तोकिएका फोकल पर्सन दुर्गा प्रसादका अनुसार सडक सीमाभित्र रहेका अधिकांश संरचना हटाइसकिएको छ भने बाँकी संरचना हटाउने काम भइरहेको छ।
उनका अनुसार सिद्धार्थ बैंक, पमपम बिल्डिङ र हनुमान मन्दिर पछाडिका केही संरचना हटाउने काम जारी छ। यसअघि सडक विस्तारका क्रममा घरधनीहरूले आंशिक रूपमा मात्र संरचना भत्काएका कारण बाँकी रहेका संरचना पनि अहिले हटाउन थालिएको उनले बताए । घण्टाघरदेखि माइस्थान चोकसम्मको सडक खण्डमा केही भवन सडकको मध्यबिन्दुबाट कायम गर्नुपर्ने दूरीका विषयमा अन्योल देखिएपछि पुनः नापजाँच गरिने भएको छ। उक्त नापजाँचसहित सडक विस्तारसँग सम्बन्धित बाँकी काम पनि एक साताभित्र पूरा गर्ने योजना रहेको प्रसादले बताए ।
‘आउँदो सोमबारसम्म मुख्य सडक विस्तारसम्बन्धी सम्पूर्ण काम सक्ने लक्ष्यसहित काम भइरहेको छ,’ उनले भने। सडक विस्तारका लागि सडक डिभिजन कार्यालय हेटौंडाले सुरुमा उत्तरतर्फ गण्डक क्षेत्रबाट र त्यसपछि दक्षिणतर्फ मितेरी पुलबाट एकैसाथ आधा दर्जनभन्दा बढी डोजर परिचालन गरेको थियो ।
डिभिजन कार्यालयले पहिलो चरणमा गत वैशाख ६ र ७ गते मुख्य सडक क्षेत्रमा करिब १ हजार २ सय घर तथा भवनको अगाडिको भाग हटाएको थियो। सडक सीमाभित्र परेका संरचना सम्बन्धित घरधनीलाई २५ दिनभित्र आफैं हटाउन आग्रह गरिएको थियो।तोकिएको समयसीमाभित्र पनि धेरै संरचना नहटाइएपछि सडक डिभिजन कार्यालयले दोस्रो चरणको अभियान अघि बढाएको हो। अहिले सडक सीमाभित्र रहेका बाँकी संरचना हटाउने तथा आवश्यक स्थानमा नापजाँच गर्ने कामलाई प्राथमिकता दिइएको छ ।
