आजदेखि सुरु भएको दोस्रो वीरगंज गोल्डकप फुटबल प्रतियोगितामा आयोजक वीरगंज युनाइटेड क्लबले विजयी सुरुवात गरेको छ ।
आदर्शनगर रंगशालामा सम्पन्न उद्घाटन खेलमा वीरगंज युनाइटेड क्लबले गरवाल डाइमण्ड फुटबल क्लब, दिल्लीलाई १–0 गोलअन्तरले पराजित गर्दै सेमिफाइनलमा प्रवेश गरेको हो । खेलको ५२औँ मिनेटमा गरवाल डाइमण्ड फुटबल क्लबका खेलाडी सन्दीप रानाले गोल गरेपछि वीरगन्ज युनाइटेड क्लबले अग्रता लिन सफल भयो ।खेलमा फर्कने प्रयास गरे पनि गरवाल डाइमण्ड फुटबल क्लबले अन्तिमसम्म गोल फर्काउन सकेन । खेलको म्यान अफ द म्याच वीरगन्ज युनाइटेड क्लबका विपिन मगर घोषित भए । उनले नगद १० हजार रुपैयाँ पुरस्कार प्राप्त गरेका छन् ।
भोलिको खेलमा सहलेश फुटबल क्लब, सिरहा र संकटा फुटबल क्लब, काठमाडौंबीच प्रतिस्पर्धा हुनेछ। प्रतियोगितामा राष्ट्रिय स्तरका आठ फुटबल टोलीको सहभागिता रहनेछ । सहभागी टोलीहरूमा संकटा फुटबल क्लब, मच्छिन्द्र फुटबल क्लब, बागमती यूथ क्लब सर्लाही, नेपाल पुलिस क्लब, एपिआई चर्च ब्वाइज युनाइटेड काठमाडौं, सलहेश फुटबल क्लब सिरहा र आयोजक वीरगन्ज युनाइटेड क्लब रहेका छन् ।
मधेस प्रदेशकै सर्वाधिक धनराशिको दोस्रो वीरगंज गोल्डकप विजेता टोलीलाई नगद ११ लाख ११ हजार १११ रुपैयाँसहित ट्रफी, मेडल र प्रमाणपत्र प्रदान गरिनेछ । उपविजेता टोलीले ५ लाख ५५ हजार ५५५ रुपैयाँ नगद, ट्रफी, मेडल र प्रमाणपत्र प्राप्त गर्नेछ ।
प्रतियोगिताको मुख्य प्रायोजक वीरगन्ज महानगरपालिका रहेको छ । प्रतियोगिता सम्पन्न गर्न करिब एक करोड रुपैयाँ खर्च लाग्ने आयोजकले जनाएको छ । दर्शकको सुविधाका लागि अस्थायी प्याराफिट निर्माण गरिएको छ । खेलको उद्घाटन वीरगन्ज महानगरपालिकाका नगरप्रमुख राजेशमान सिंहले गरेका थिए। उद्घाटन खेल हेर्न हजारौँ दर्शक आदर्शनगर रंगशालामा उपस्थित भएका थिए ।
