नेपाली कांग्रेसका सभापति गगनकुमार थापाले पार्टीको कार्यशैली र संगठन निर्माणको तरिका परिवर्तन गर्नुपर्नेमा जोड दिँदै आफूलाई पार्टीका नियमित प्रशासनिक कामबाट अलग राख्ने घोषणा गरेका छन् ।
उनले पार्टीको दैनिक कामको जिम्मेवारी वरिष्ठ उपसभापति र महामन्त्रीहरूलाई दिएर आफू देशभरका नेता, कार्यकर्ता तथा नागरिकसँग भेटघाट गर्ने र उनीहरूका कुरा सुन्ने बताएका छन् ।
शुक्रबार काठमाडौंमा आयोजित नेपाल पेसाकर्मी अभियान परिषद्को कार्यक्रममा सम्बोधन गर्दै सभापति थापाले नेपाली कांग्रेसले बदलिँदो समाजका आवश्यकता र समसामयिक मुद्दालाई सम्बोधन गर्नुपर्ने बताए । बीपी कोइराला र गणेशमान सिंहको पालाका मुद्दाले मात्रै अहिलेको समाजको पूर्ण प्रतिनिधित्व गर्न नसक्ने उल्लेख गर्दै उनले वर्तमान समयका चुनौती समाधान गर्ने दिशामा पार्टी केन्द्रित हुनुपर्ने धारणा राखे ।
थापाले आजको नेपाली समाजका आवश्यकता सम्बोधन गर्न ‘समुन्नति’ को अवधारणा अघि सारे । पर्यावरण संरक्षण, आर्थिक विकास, सुशासन र प्रजातान्त्रिक अधिकारलाई सँगसँगै अघि बढाउनुपर्ने उनको भनाइ थियो । सामाजिक सञ्जालका ‘रिल्स’मा मात्रै केन्द्रित भएर राजनीतिक उद्देश्य पूरा नहुने भन्दै उनले समस्याको समाधानका लागि गम्भीर छलफल, बहस र चिन्तन आवश्यक रहेको बताए ।
नागरिकका आकाङ्क्षा पूरा गर्न सक्ने पार्टीका रूपमा कांग्रेसलाई स्थापित गर्नु आफ्नो मुख्य उद्देश्य रहेको उनले स्पष्ट पारे । यसका लागि पार्टीका नियमित प्रशासनिक कामबाट आफू अलग रहने र वरिष्ठ उपसभापति तथा महामन्त्रीहरूले पार्टीको दैनिक गतिविधि सञ्चालन गर्ने व्यवस्था मिलाउने उनको योजना छ ।
पार्टीका नेता तथा कार्यकर्ताको व्यक्तिगत जीवन, आचरण र आर्थिक पारदर्शिताको जिम्मेवारी सम्बन्धित व्यक्तिले नै लिनुपर्ने थापाले बताए। कुनै व्यक्तिको व्यक्तिगत कमजोरीका लागि सिङ्गो पार्टीलाई जिम्मेवार ठहर गर्न नहुने उनको तर्क थियो । सञ्चारमाध्यमलाई पनि व्यक्तिगत कमजोरीका आधारमा सिङ्गो पार्टीलाई दोषी नठहराउन उनले आग्रह गरे ।
यसैगरी, पार्टीको आन्तरिक प्रतिस्पर्धामा पराजित भएका वा जिम्मेवारीबाट बाहिरिएका योग्य नेताहरूलाई समेटेर अघि बढ्ने प्रतिबद्धता उनले जनाए । आन्तरिक निर्वाचनमा जित र हारलाई नेतृत्वको अन्तिम मापदण्डका रूपमा लिन नहुने बताउँदै थापाले सबैलाई समेटेर सामूहिक नेतृत्व, सहकार्य र एकताका साथ पार्टी अघि बढाउनुपर्नेमा जोड दिए ।
पार्टीभित्रको गुटगत प्रभावभन्दा माथि उठेर योग्य नेतृत्वलाई समेट्नु अहिलेको आवश्यकता रहेको उनको भनाइ थियो । नागरिकका अपेक्षा पूरा गर्न कांग्रेसको कार्यशैली, संगठन निर्माण र राजनीतिक प्राथमिकतामा परिवर्तन आवश्यक रहेको सन्देश उनले दिएका छन् ।
