सामाजिक सञ्जाल फेसबुकमा हतियार प्रदर्शन गरेको आरोपमा रौतहटको कटहरिया नगरपालिका–५ का उमर फारूकलाई प्रहरीले पक्राउ गरेको छ ।
स्थानीय ओसी मोहम्मदका छोरा अन्दाजी २५ देखि ३० वर्ष उमेरका फारूकलाई मंगलबार इलाका प्रहरी कार्यालय कटहरियाको टोलीले पक्राउ गरेको हो । वरिष्ठ प्रहरी सहायक निरीक्षक (सई) जयप्रकाश साहको कमान्डमा खटिएको टोलीले उनलाई नियन्त्रणमा लिएर थप अनुसन्धानका लागि इलाका प्रहरी कार्यालय गरुडामा बुझाएको प्रहरीले जनाएको छ ।
इलाका प्रहरी कार्यालय गरुडाका प्रमुख प्रहरी नायब उपरीक्षक (डीएसपी) शंकरप्रसाद आचार्यले फारूक पक्राउ परेको पुष्टि गर्दै घटनाबारे अनुसन्धान भइरहेको जानकारी दिएका छन् ।
प्राप्त विवरणअनुसार फारूकले केही समयअघि आफ्नो फेसबुक खातामा हतियार प्रदर्शन गरिएको तस्बिर वा सामग्री सार्वजनिक गरेका थिए। उक्त सामग्री सार्वजनिक भएपछि प्रहरीले घटनालाई अनुसन्धानको दायरामा ल्याएको हो ।
सामाजिक सञ्जालमा हतियार प्रदर्शन गरिएको विषयमा प्रहरीले हतियारको वास्तविकता, स्रोत, स्वामित्व तथा त्यसको प्रयोग वा राख्ने अनुमति भए–नभएकोबारे अनुसन्धान गर्नुपर्ने देखिन्छ ।
हालसम्म हतियार बरामद भएको वा त्यसको वैधानिकताबारे प्रहरीले आधिकारिक विवरण सार्वजनिक गरेको छैन। अनुसन्धान पूरा भएपछि घटनाको थप विवरण खुल्ने अपेक्षा गरिएको छ ।
-Recovered@1x_1-1792308710.jpg){kind=logo}