कर्णाली याक्स नेपाल प्रिमियर लिग ९एनपीएल० को तेस्रो सिजनका लागि कोर टिमलाई निरन्तरता दिँदै नयाँ खेलाडीका साथ मैदानमा उत्रिने तयारीमा छ।
नेपाली राष्ट्रिय टोलीका अनुभवी खेलाडी सोमपाल कामीको कप्तानीमा रहेको कर्णालीले यसपटक बंगलादेश र पाकिस्तानका खेलाडीलाई अनुबन्ध गर्दै टोलीलाई थप बलियो बनाउने प्रयास गरेको छ।
कर्णाली प्रदेशको प्रतिनिधित्व गर्ने कर्णाली याक्स एनपीएलका चर्चित टोलीमध्ये एक हो। यसअघि दुई सिजनमा फरक–फरक प्रदर्शन गरेको टोलीले पहिलो सिजन लिगमा चौथो स्थान हासिल गर्दै प्लेअफमा स्थान बनाएको थियो। तर, दोस्रो सिजन छैटौँ स्थानमा सीमित हुँदा प्लेअफमा पुग्न सकेन । पहिलो सिजन भारतीय स्टार शिखर धवनलाई अनुबन्ध गरेर चर्चामा आएको कर्णालीले दोस्रो सिजन स्कटल्यान्डका मार्क वाटको प्रदर्शनबाट थप चर्चा बटुलेको थियो। वाटले उक्त सिजन सबैभन्दा छिटो शतक प्रहार गर्दै टोलीको आकर्षण बढाएका थिए।
कप्तान सोमपाल कामीसहित गुल्शन झा, नन्दन यादव र अन्य प्रतिभावान् नेपाली खेलाडी रहेको कर्णालीले यसपटक पनि अनुभवी तथा युवा खेलाडीको संयोजनमा टोली निर्माण गरेको छ। अघिल्ला दुई सिजन मुख्य प्रशिक्षकको जिम्मेवारी सम्हालेका ज्ञानेन्द्र मल्ल यसपटक क्रिकेट निर्देशकको भूमिकामा छन्। टोलीको कन्सल्ट्यान्ट प्रशिक्षकमा राजु बस्न्यात रहेका छन्।
कोर टिमलाई निरन्तरता
कर्णाली याक्सले तेस्रो सिजनका लागि अघिल्ला सिजनमा टोलीबाट खेलिसकेका खेलाडीलाई निरन्तरता दिएको छ। कप्तान सोमपाल कामी, गुल्शन झा, नन्दन यादव र युनिश विक्रम ठकुरीलगायत खेलाडी टोलीमा कायम छन्।
पहिलो सिजन ट्यालेन्ट हन्टमार्फत आइकोनिक खेलाडीका रूपमा टोलीमा आएका विपिन शर्मा दोस्रो सिजन पनि कर्णालीमै रहेका थिए। तेस्रो सिजनका लागि उनलाई सुरुमा रिलिज गरिए पनि अक्सनमार्फत पुनः टोलीमा अनुबन्ध गरिएको छ।
त्यसैगरी, दोस्रो सिजन अक्सनबाट भित्रिएका पवन सर्राफ, दीपक डुम्रे र युवराज खत्रीलाई कर्णालीले रिटेन गरेको छ। दोस्रो सिजन टोलीमा रहेका दीपेन्द्र रावतलाई भने यसपटक अक्सनमार्फत पुनः अनुबन्ध गरिएको छ।
टोलीले अक्सनबाट ब्याटर शुभ कंशाकार, स्पिनर सूर्य तामाङ तथा स्थानीय खेलाडी दिवान पुन र सचिन शर्मालाई पनि समेटेको छ। बेलायतमा क्रिकेट प्रशिक्षण लिएका सचिन शर्माको आगमनले टोलीमा थप विकल्प उपलब्ध गराएको छ।
यसरी कर्णालीले पुराना खेलाडीको अनुभव र नयाँ खेलाडीको सम्भावनालाई समेट्दै तेस्रो सिजनका लागि टोली तयार पारेको छ।
बंगलादेश र पाकिस्तानका खेलाडीमा भरोसा
कर्णाली याक्सले यसपटक विदेशी खेलाडी छनोटमा पनि विशेष ध्यान दिएको छ। विगतका सिजनमा शिखर धवन र अस्ट्रेलियाका यू–१९ टोलीका पूर्वकप्तान विल बोसिस्टोजस्ता खेलाडीलाई अनुबन्ध गरेको कर्णालीले तेस्रो सिजनका लागि बंगलादेश र पाकिस्तानका खेलाडीलाई टोलीमा समेटेको छ।
टोलीमा बंगलादेशका विकेटकिपर ब्याटर अकबर अली र युवा ब्याटर अरिफुल इस्लाम अनुबन्ध भएका छन्। अकबर अलीले सन् २०२० मा बंगलादेशको यू–१९ टोलीको कप्तानी गर्दै आईसीसी यू–१९ विश्वकपको उपाधि जिताउन महत्त्वपूर्ण भूमिका खेलेका थिए। अकबर र अरिफुल दुवैले उमेर समूह तथा बंगलादेश ए टोलीबाट खेलिसकेका छन्।
त्यसैगरी, पाकिस्तानका साहिबजादा फरहान र हुसेन तलत पनि कर्णालीको टोलीमा समेटिएका छन्। यी खेलाडीको आगमनले ब्याटिङ र अलराउन्ड प्रदर्शनमा टोलीलाई थप बलियो बनाउने अपेक्षा गरिएको छ।
स्कटल्यान्डका मार्क वाटलाई निरन्तरता दिएको कर्णालीले विदेशी खेलाडीको संयोजनमार्फत ब्याटिङ र बलिङ दुवै पक्षमा सन्तुलन कायम गर्ने रणनीति लिएको देखिन्छ।
ब्याटिङ र बलिङमा सन्तुलन बनाउने लक्ष्य
कर्णाली याक्सले यसपटक ब्याटिङदेखि बलिङसम्म विभिन्न विकल्प उपलब्ध हुने गरी खेलाडी छनोट गरेको छ। अकबर अलीले विकेटकिपिङसँगै ब्याटिङको जिम्मेवारी सम्हाल्न सक्नेछन् भने मार्क वाटले स्पिन बलिङमा योगदान दिने अपेक्षा गरिएको छ।
स्पिन बलिङमा वाटलाई नेपाली खेलाडी सूर्य तामाङ, विपिन शर्मा, युनिश विक्रम ठकुरी, दीपेन्द्र रावत र पवन सर्राफले साथ दिन सक्नेछन्। त्यस्तै, तीव्र गतिका बलरमा कप्तान सोमपाल कामी, नन्दन यादव र गुल्शन झा प्रमुख विकल्पका रूपमा रहनेछन् ।
ब्याटिङतर्फ विदेशी खेलाडीका साथै शुभ कंशाकारलगायत नेपाली खेलाडीबाट पनि टोलीले अपेक्षा राखेको छ। अनुभवी राष्ट्रिय खेलाडी, युवा प्रतिभा र विदेशी खेलाडीको संयोजनले तेस्रो सिजनमा कर्णालीको प्रदर्शन सुधार हुने विश्वास गरिएको छ ।
पहिलो सिजन प्लेअफसम्म पुगेको तर दोस्रो सिजनमा पछाडि परेको कर्णालीका लागि यसपटक पुनः बलियो पुनरागमन गर्ने चुनौती हुनेछ। कोर टिमलाई निरन्तरता दिँदै विदेशी खेलाडी थपेको कर्णालीले एनपीएलको तेस्रो सिजनमा कस्तो प्रदर्शन गर्छ भन्ने चासो बढेको छ।
कर्णाली याक्सको टोली
रिटेन गरिएका खेलाडीस् सोमपाल कामी, गुल्शन झा, नन्दन यादव, पवन सर्राफ, दीपक डुम्रे, युनिश विक्रम ठकुरी र युवराज खत्री ।
अक्सनमार्फत अनुबन्धित खेलाडीस् विपिन शर्मा, दीपेन्द्र रावत, शुभ कंशाकार, सूर्य तामाङ, दिवान पुन र चिरन शर्मा ।
विदेशी खेलाडीस् मार्क वाट, अकबर अली, अरिफुल इस्लाम, साहिबजादा फरहान र हुसेन तलत।
क्रिकेट निर्देशकस् ज्ञानेन्द्र मल्ल
कन्सल्ट्यान्ट प्रशिक्षकस् राजु बस्न्यात
