वीरगंज महानगरपालिकाका प्रमुख प्रशासकीय अधिकृत बसन्त बोहरामाथि भएको भनिएको दुर्व्यवहार तथा आक्रमण प्रयासको घटनालाई मिलापत्रमार्फत सामसुम पार्ने प्रयास भइरहेको आरोप लागेको छ । घटनाको निष्पक्ष छानबिन र दोषीमाथि कारबाहीको माग गर्दै जिल्ला प्रशासन कार्यालय पर्सामा उजुरी दिएका बोहरालाई नै ठेकेदारसँग सहमति गरेर निवेदन फिर्ता लिन दबाब दिइएको महानगरका कर्मचारीहरूले दाबी गरेका छन् ।
मेयर राजेशमान सिंहनिकट मानिने ठेकेदार निराजन अधिकारीसहित चार जनाको समूह मध्यरातमा प्रमुख प्रशासकीय अधिकृत बोहराको निवासमै पुगेको थियो । उक्त समूहले बोहरासहित महानगरका अन्य कर्मचारीमाथि दुर्व्यवहार गर्नुका साथै आक्रमणको प्रयास गरेको आरोप छ ।
महानगरपालिकामा भुक्तानीका लागि पेस गरिएका केही बिल तथा फाइलमा कानुनी प्रक्रिया पूरा नभएको र अस्वाभाविक मूल्य उल्लेख गरिएको भन्दै भुक्तानी प्रक्रिया अघि बढाउन बोहराले अस्वीकार गरेपछि उनीमाथि दबाब र दुर्व्यवहार भएको बताइएको छ ।
घटनापछि आफ्नो सुरक्षामाथि जोखिम देखेका बोहरा गत बिहीबार राति वीरगंज छाडेर काठमाडौं फर्किएका थिए । त्यसपछि उनले आइतबार पर्साका प्रमुख जिल्ला अधिकारी भोला दाहाललाई सम्बोधन गर्दै घटनाको निष्पक्ष छानबिन गरी दोषीमाथि कारबाही गर्न मागसहित उजुरी दिएका थिए ।
बोहराले उक्त उजुरीको बोधार्थ प्रधानमन्त्री तथा मन्त्रिपरिषद्को कार्यालय, सङ्घीय मामिला तथा सामान्य प्रशासन मन्त्रालय, जिल्ला प्रहरी कार्यालय पर्सा तथा वीरगञ्ज महानगरपालिकाका मेयर र उपमेयरलाई समेत दिएका थिए ।
तर, उजुरी परेपछि अनुसन्धान प्रक्रिया अघि बढाउनुभन्दा पनि दुवै पक्षबीच सहमति गराएर घटनालाई टुंग्याउने प्रयास भइरहेको महानगरका कर्मचारीहरूको दाबी छ । महानगर स्रोतका अनुसार मंगलबार काठमाडौंमा रहेका बोहरालाई वीरगञ्ज बोलाइएको थियो। प्रमुख जिल्ला अधिकारीको रोहवरमा दुवै पक्षबीच सहमति गराउने प्रयास भइरहेको स्रोतको भनाइ छ ।
महानगरका एक कर्मचारीका अनुसार घटनामा मेयर राजेशमान सिंहसँग निकट सम्बन्ध रहेका ठेकेदार जोडिएकाले यसलाई सामान्य विवादका रूपमा प्रस्तुत गर्ने प्रयास भइरहेको छ। सङ्घीय सरकारको प्रतिनिधिका रूपमा महानगरमा कार्यरत प्रमुख प्रशासकीय अधिकृत नै आफ्नै निवासमा असुरक्षित भएको भन्दै कारबाही माग्नुपर्ने अवस्था आउनु गम्भीर विषय भएको ती कर्मचारीको भनाइ छ।
प्रमुख जिल्ला अधिकारी भन्छन्– सामान्य घटनालाई अतिरञ्जित गरियो
यस विषयमा पर्साका प्रमुख जिल्ला अधिकारी भोला दाहालले भने घटनालाई सामान्य रूपमा प्रस्तुत गरेका छन्। एउटै कार्यालयभित्र भएको सामान्य घटनालाई सञ्चारमाध्यमले अतिरञ्जित गरेको उनको टिप्पणी छ ।
“यो सामान्य विषय हो, यसलाई अतिरञ्जित गर्न आवश्यक छैन,” दाहालले भने ।
काठमाडौंमा रहेका बोहरालाई बोलाएर मंगलबार जिल्ला प्रशासन कार्यालयमा छलफल गरिएको भन्ने सूचनाबारे प्रश्न गर्दा दाहालले आफूले बोहरालाई नबोलाएको दाबी गरे। बोहराको कार्यक्षेत्र नै वीरगंज भएकाले उनलाई बोलाउनुपर्ने कुनै कारण नभएको भन्दै उनले आफूले सहजीकरण गरेको भन्ने कुरा पनि सत्य नभएको बताए ।
यता महानगरका केही कर्मचारीले भने सामान्य नागरिकविरुद्ध उजुरी पर्दासमेत अनुसन्धान र कानुनी प्रक्रिया अघि बढाउने प्रहरी प्रशासनले यस प्रकरणमा मिलापत्रको बाटो खोज्नुले प्रशासनिक निष्पक्षतामाथि प्रश्न उठाएको बताएका छन् ।
कर्मचारीहरूका अनुसार निराजन अधिकारीसँग सम्बन्धित खरिद तथा भुक्तानीका फाइलमाथि अनुसन्धान अघि बढेमा महानगरको नेतृत्वसमेत अप्ठ्यारोमा पर्न सक्ने भएकाले घटनालाई सहमतिमा टुंग्याउने प्रयास भएको हुन सक्ने आशङ्का छ ।
मेयरले पनि माफी दिन आग्रह गरेको कर्मचारीको दाबी
महानगर स्रोतका अनुसार मेयर राजेशमान सिंहले समेत प्रमुख प्रशासकीय अधिकृत बोहरालाई फोन गरेर ‘केटाहरूबाट गल्ती भएको’ भन्दै घटनालाई सामान्य रूपमा लिएर उनीहरूलाई माफी दिन आग्रह गरेका थिए । यद्यपि, यस विषयमा मेयर सिंहको आधिकारिक धारणा प्राप्त हुन सकेको छैन ।
प्रमुख प्रशासकीय अधिकृत बोहरासँग प्रतिक्रिया लिन सम्पर्क गर्ने प्रयास गर्दा उनको मोबाइल फोन स्विच अफ रहेकाले सम्पर्क हुन सकेन ।
भुक्तानीका फाइल रोकिएपछि दबाब सिर्जना गरिएको आरोप
महानगरका कर्मचारीहरूले घटनालाई सामान्य विवाद भन्दै मिलापत्र गराउने प्रयासले कर्मचारीको मनोबल कमजोर बनाउने चिन्ता व्यक्त गरेका छन् । कार्यालयको प्रशासनिक काममा कानुनसम्मत निर्णय गर्ने अधिकारीमाथि दबाब, धम्की र दुर्व्यवहार हुने तर त्यसलाई प्रशासनिक सहमतिका नाममा टुंग्याउने प्रवृत्तिले महानगरमा गलत नजिर स्थापित हुन सक्ने उनीहरूको भनाइ छ ।
प्रमुख प्रशासकीय अधिकृतसहित अन्य कर्मचारीमाथि भएको भनिएको दुर्व्यवहारलाई ओझेलमा पार्न केही सञ्चारमाध्यमसमेत प्रयोग गर्न खोजिएको कर्मचारीहरूको गुनासो छ ।
महानगरका एक अधिकृतका अनुसार कानुनी प्रक्रिया पूरा नगरेका योजना, खरिद प्रक्रिया नपुगेका फाइल तथा बजार मूल्यभन्दा अस्वाभाविक रूपमा बढी दर राखेर भुक्तानीका लागि पेस गरिएका बिल रोकिएपछि बोहराविरुद्ध केही सञ्चारमाध्यममा योजनाबद्ध समाचार प्रकाशित हुन थालेका छन् ।
कर्मचारीहरूका अनुसार बोहराले महानगरमा ८० करोड रुपैयाँभन्दा बढी दायित्व रहेको र त्यसका कारण समयमा कर्मचारीलाई तलबसमेत दिन कठिन हुने अवस्था आउन नदिन आर्थिक अनुशासन कायम गर्ने प्रयास गरेका थिए । महानगरलाई थप आर्थिक भारबाट जोगाउन खोज्दा केही जनप्रतिनिधि र स्वार्थ समूहबाट दबाब सिर्जना भएको उनीहरूको बुझाइ छ ।
यस विषयमा ठेकेदार निराजन अधिकारीसँग प्रतिक्रिया लिन खोज्दा उनको मोबाइल फोन स्विच अफ रहेकाले सम्पर्क हुन सकेन । यसअघि रेसखबरमा प्रकाशित उनको भनाइअनुसार उनले आफूले कसैलाई हातपात नगरेको र भुक्तानीको विषयमा बुझ्न जाँदा उल्टै प्रमुख प्रशासकीय अधिकृतले गालीगलौज गरेको दाबी गरेका थिए ।
भुक्तानी प्रक्रिया कानुनअनुसार अघि बढाउनुपर्ने प्रशासनिक दायित्व निर्वाह गर्दा प्रमुख प्रशासकीय अधिकृतमाथि नै दबाब सिर्जना भएको र त्यसपछि भएको भनिएको दुर्व्यवहारको उजुरीसमेत मिलापत्रबाट टुंग्याउन खोजिएको प्रकरणले वीरगंज महानगरपालिकाको प्रशासनिक कार्यशैली, आर्थिक पारदर्शिता र कर्मचारी सुरक्षामाथि गम्भीर प्रश्न खडा गरेको छ ।
घटनाको निष्पक्ष छानबिन गरी वास्तविकता सार्वजनिक गर्नुका साथै दोषी देखिएकामाथि कानुनी कारबाही हुनुपर्ने माग महानगरका कर्मचारीहरूले गरेका छन् ।
