चालु आर्थिक वर्ष २०८३/८४ को पहिलो तीन महिनामा वीरगंज नाका हुँदै हुने खाद्यान्न आयातमा उल्लेख्य गिरावट आएको छ । अघिल्लो आर्थिक वर्षको सोही अवधिको तुलनामा खाद्यान्न आयात करिब ६३ प्रतिशतले घटेको हो ।
वीरगंज भन्सार कार्यालयको तथ्याङ्कअनुसार चालु आवको साउनदेखि असोजसम्ममा चामल, मकै, गहुँ, धान, माल्ट, फापर, कोदोलगायत गरी तीन करोड १६ लाख ४० हजार किलो खाद्यान्न आयात भएको छ । जबकि अघिल्लो आर्थिक वर्षको सोही अवधिमा आठ करोड ७० लाख ४७ हजार किलो खाद्यान्न आयात भएको थियो ।
वीरगंज भन्सार कार्यालयका प्रमुख भन्सार प्रशासक कृष्णप्रसाद मैनालीका अनुसार चालु आवको पहिलो तीन महिनामा ६७ लाख ७३ हजार ६२९ किलो चामल आयात भएको छ । अघिल्लो आर्थिक वर्षको सोही अवधिमा ९४ लाख एक हजार किलो चामल आयात भएको थियो । चामल आयातको मूल्यसमेत अघिल्लो वर्षको ८९ करोड ८१ लाख रुपैयाँबाट घटेर चालु आवमा ७० करोड रुपैयाँमा झरेको छ ।
त्यस्तै, धान आयातमा पनि ठूलो गिरावट आएको छ । अघिल्लो आर्थिक वर्षको पहिलो त्रैमासिकमा तीन करोड ९१ लाख किलो धान आयात भएकामा चालु आवको सोही अवधिमा ६९ लाख ३५ हजार ४६० किलो मात्रै आयात भएको छ । धान आयातको मूल्यसमेत एक अर्ब ४६ करोड २८ लाख रुपैयाँबाट घटेर ३३ करोड ३५ लाख रुपैयाँमा सीमित भएको छ ।
मकै आयातमा पनि उल्लेख्य कमी आएको भन्सार कार्यालयको तथ्याङ्कले देखाएको छ । अघिल्लो आर्थिक वर्षको पहिलो तीन महिनामा तीन करोड ३६ लाख १२ हजार ८१० किलो मकै आयात भएकामा चालु आवमा ६७ लाख ३६ हजार ४३७ किलो मात्रै आयात भएको छ । मकै आयातको मूल्यसमेत एक अर्ब ८० करोड १३ लाख रुपैयाँबाट घटेर ६० करोड ९८ लाख रुपैयाँमा झरेको छ ।
यसैगरी, फापर, कोदो तथा अन्य खाद्यान्नको आयात पनि घटेको छ । अघिल्लो आर्थिक वर्षको पहिलो तीन महिनामा २३ लाख ४१ हजार ६५५ किलो आयात भएकामा चालु आवको सोही अवधिमा घटेर १६ लाख ४० हजार ५५५ किलोमा सीमित भएको भन्सार कार्यालयले जनाएको छ ।
वीरगंज नाकाबाट खाद्यान्न आयातको परिमाण र मूल्य दुवैमा आएको गिरावटले पछिल्लो तीन महिनामा खाद्यान्नको आयात व्यापार खुम्चिएको देखाएको छ ।
