वीरगंज महानगरपालिकाले फोहोर व्यवस्थापनका लागि निर्माण गरेको फोहोरमैला प्रशोधन केन्द्र व्यवस्थित रूपमा सञ्चालन नहुँदा नगवाका स्थानीय बासिन्दा दुर्गन्ध र प्रदूषणको समस्याबाट पीडित भएका छन् ।
वीरगंज महानगरपालिका–१६ स्थित १७ बिघा क्षेत्रफलमा फैलिएको उक्त फोहोरमैला प्रशोधन केन्द्र निर्माणमा ४७ करोड ६१ लाख ८० हजार रुपैयाँ खर्च गरिएको छ । महानगरपालिका कार्यालयका अनुसार नगर क्षेत्रमा दैनिक ६२ दशमलव २३ मेट्रिक टन फोहोर तथा फोहोरजन्य पदार्थ उत्पादन हुने गरेको छ । उक्त फोहोरलाई वैज्ञानिक ढंगले प्रशोधन तथा व्यवस्थापन गर्ने उद्देश्यले केन्द्र निर्माण गरिएको हो।
तर, प्रशोधन केन्द्रबाट निस्कने दुर्गन्धित हावाका कारण आसपासका बस्तीमा बसोबास गर्ने स्थानीयलाई घरभित्रै बस्नसमेत कठिनाइ हुन थालेको छ। फोहोरबाट फैलिने दुर्गन्धले स्वास्थ्यमा विभिन्न समस्या निम्त्याउन सक्ने भन्दै स्थानीय बासिन्दाले चिन्ता व्यक्त गरेका छन् ।
