वीरगंज महानगरपालिका वडा नम्बर ३१ का वडा अध्यक्ष जितेन्द्र यादवले वडामा ९ वटा विद्यालय र ३ वटा स्वास्थ्य चौकी सञ्चालनमा रहे पनि शिक्षा तथा स्वास्थ्य क्षेत्रको अवस्थामा अपेक्षित सुधार हुन नसकेको गुनासो गरेका छन् ।
शिक्षा र स्वास्थ्य क्षेत्र सुधारका लागि पटक–पटक पहल गर्दा पनि महानगरपालिकाबाट आवश्यक सहयोग र समन्वय नपाएको भन्दै उनले महानगरको नेतृत्व तथा सम्बन्धित शाखाको कार्यशैलीमाथि प्रश्न उठाएका छन् ।
वडा अध्यक्ष यादवका अनुसार आफ्नो कार्यकालको सुरुदेखि नै वडाको शैक्षिक तथा स्वास्थ्य अवस्था सुधार गर्न विभिन्न प्रयास हुँदै आएका छन् । विद्यालयको नियमित अनुगमन, शिक्षकको जिम्मेवारी सुनिश्चितता, पठनपाठनको गुणस्तर वृद्धि तथा स्वास्थ्य चौकीको सेवा प्रवाह प्रभावकारी बनाउने उद्देश्यले पहल गरिए पनि अपेक्षित नतिजा प्राप्त हुन नसकेको उनको भनाइ छ ।
उनले विद्यालयमा लापरवाही गर्ने शिक्षकलाई कारबाही गर्न महानगरपालिकालाई पटक–पटक पत्राचार गर्दा पनि सुनुवाइ नभएको आरोप लगाएका छन् । उनका अनुसार जिम्मेवारी पूरा नगर्ने शिक्षकलाई कारबाहीको माग गर्दै १० पटकसम्म पत्राचार गरिए पनि सम्बन्धित निकायले प्रभावकारी कदम चालेको छैन ।
वडा अध्यक्ष यादवले मेयर राजेशमान सिंहसमक्ष समेत शिक्षकहरूको लापरवाहीबारे प्रमाणसहित पटक–पटक जानकारी गराएको बताएका छन् । तर, आफूले प्रमाणसहित पेस गरेका उजुरी र सुधारका लागि पठाइएका फाइलसमेत बेवास्ता हुने गरेको उनको आरोप छ ।
शिक्षक दरबन्दी व्यवस्थापनमा समेत महानगरपालिकाको शिक्षा शाखाले प्रभावकारी भूमिका निर्वाह गर्न नसकेको यादवको गुनासो छ । शिक्षा शाखाका कर्मचारीहरूको प्रभाव र हस्तक्षेपका कारण आवश्यकताअनुसार शिक्षक दरबन्दी मिलान गर्न समस्या भइरहेको उनले बताएका छन् ।
उनका अनुसार विद्यालयमा विद्यार्थी सङ्ख्या र आवश्यकताका आधारमा शिक्षक व्यवस्थापन हुनुपर्ने हो । तर, कतिपय विद्यालयमा विद्यार्थी सङ्ख्याको तुलनामा शिक्षकको असन्तुलित वितरण रहेको छ । ७ जना विद्यार्थीका लागि ३ जना, २० जना विद्यार्थीका लागि ५ जना र ३५ जना विद्यार्थीका लागि ६ जना शिक्षक रहने अवस्थाले दरबन्दी व्यवस्थापनमा पुनर्विचार गर्नुपर्ने आवश्यकता देखाएको उनको भनाइ छ ।
एउटै शिक्षकले ४० जनासम्म विद्यार्थीलाई अध्यापन गराउन सक्ने अवस्थामा पनि विद्यालयहरूबीच शिक्षकको उचित वितरण हुन नसकेको उनले बताएका छन्। विद्यार्थी सङ्ख्या, विद्यालयको आवश्यकता र उपलब्ध शिक्षकको अवस्थालाई आधार बनाएर दरबन्दी मिलान गर्न सके शैक्षिक गुणस्तर सुधार गर्न सकिने उनको तर्क छ ।
यादवले महानगरपालिकाको शिक्षा शाखामा आर्थिक अनियमितता तथा मिलेमतो भइरहेको हुन सक्ने आशङ्कासमेत व्यक्त गरेका छन् । शिक्षक दरबन्दी मिलानदेखि विद्यालय व्यवस्थापनसम्मका विषयमा पारदर्शिता नरहेको र लाखौँ रुपैयाँको आर्थिक चलखेल हुन सक्ने उनको आरोप छ। यद्यपि, यससम्बन्धी आरोपको स्वतन्त्र पुष्टि हुन बाँकी छ ।
शिक्षासँगै स्वास्थ्य क्षेत्रको अवस्था सुधार गर्न पनि महानगरपालिकाले अपेक्षित सहयोग नगरेको उनको गुनासो छ । वडामा तीनवटा स्वास्थ्य चौकी सञ्चालनमा रहे पनि सेवा प्रवाह, व्यवस्थापन र नियमित अनुगमनलाई प्रभावकारी बनाउन नसकिएको उनले बताएका छन् ।
शिक्षा र स्वास्थ्य नागरिकका आधारभूत आवश्यकता भए पनि सुधारका लागि जनप्रतिनिधिले गरेको पहललाई महानगरपालिकाले गम्भीरतापूर्वक नलिएको यादवको आरोप छ । जनताको समस्या समाधान गर्न स्थानीय जनप्रतिनिधिले पटक–पटक आग्रह गर्दा पनि सुनुवाइ नहुने हो भने नागरिकका गुनासा कसले सम्बोधन गर्ने भन्ने प्रश्न उनले उठाएका छन् ।
