सामाजिक सञ्जालमार्फत सुरु भएको एक सम्बन्ध अन्ततः फिरौती असुली र यौन शोषणको धम्कीमा परिणत भएको छ ।
राजधानी काठमाडौंमा घटेको यो घटना प्रविधिको दुरुपयोग हुँदै कसरी संगठित आपराधिक गतिविधिमा रुपान्तरित हुनसक्छ भन्ने कुराको ज्वलन्त उदाहरण बनेको छ । घटनाको सुरुवात भयो ‘राज चौलागाईं’ (नाम परिवर्तन) नामका व्यक्तिलाई ‘आँचल चौगुठी’ नामक फेसबुक प्रोफाइलबाट आएको फ्रेन्ड रिक्वेस्टबाट।
राजले उक्त अनुरोध तुरुन्तै स्वीकार गरे र त्यसपछि दुवैबीच कुराकानी सुरु भयो । केही दिनमै आँचलले राजलाई महाराजगञ्जस्थित बगर हाउसमा भेट्न बोलाइन् ।
पहिलो भेटदेखि फसाउने रणनीति
२०८१ चैत २३ गते राज आँचल र उनका साथकी ममता तामाङसँग पहिलोपटक भेट्न बगर हाउस पुगे। केही दिनपछि २०८१ चैत २६ गते उनीहरूले राजलाई ठमेलको होलिडे रिजेन्सी होटेलमा बोलाए । होटेलमा खाजासँगै मादक पदार्थ सेवनका क्रममा राज अचेत भएको र त्यही क्रममा आँचल र राजबीच भएको शारीरिक निकटताका नग्न तस्बिर तथा भिडियो ममता तामाङले खिचेको जाहेरीमा उल्लेख छ ।
फोटो र भिडियोमार्फत ब्ल्याकमेलिङ सुरु
एक महिनापछि, २ जेठ २०८२ मा राजलाई ती फोटो र भिडियो पठाउँदै यौन शोषणको मुद्दा हालिएको भन्दै फर्जी निवेदनसमेत पठाइयो। साथमा काठमाडौँको घर र चार आना जग्गा दिनुपर्ने शर्त राखेर ब्ल्याकमेल गर्न थालियो । मानसिक दबाबमा परेका राजबाट केही रकम असुल गरियो ।
७० लाख माग, ५ लाखको चेक
पछि राजलाई अनामनगरस्थित टिम्बुर रेस्टुरेन्टमा बोलाएर ‘केस मिलाउन’ भन्दै ७० लाख रुपैयाँको माग राखियो । धम्कीपछि ८ जेठमा राजले प्राइम कमर्सियल बैंकको आफ्नो खाताबाट आँचल चौगुठीका नाममा ५ लाखको चेक काटिदिए। बाँकी रकम नपाउँदासम्म ती व्यक्तिहरूले राजलाई मानसिक यातना दिँदै ब्ल्याकमेल गर्दै गए ।
प्रहरीमा उजुरी र पक्राउ
राजले ७ जेठमा प्रहरीमा उजुरी दिएका थिए। सोही दिन आँचल चौगुठी र ममता तामाङ पक्राउ परे । उनीहरूको साथबाट ५ लाखको चेक र मोबाइल फोनहरू बरामद गरिएको छ । बयानमा दुवैले अपराध स्वीकारेका छन् । आँचलले योजनाका प्रमुख राजेन्द्र विष्टको निर्देशनमा कार्य गरेको बताएकी छिन् ।
मुख्य योजनाकार फरार, मुद्दा अदालतमा
३४ वर्षीया आँचल भक्तपुर घर भई हाल हाँडीगाउँ र ममता कैलाली घर भई हाल कालोपुलमा बस्दै आएकी छन् । घटनाका मुख्य योजनाकार दीपक विष्ट र राजेन्द्र विष्ट भने फरार छन् । उनीहरू कञ्चनपुरका स्थायी बासिन्दा हुन् र काठमाडौंमै बसोबास गरिरहेका थिए। उनीहरूका लागि अदालतबाट पक्राउ पुर्जी जारी भइसकेको छ । पक्राउ परेकामाथि आपराधिक लाभ (extortion) अन्तर्गत मुद्दा दायर गरिएको छ ।
सामाजिक सञ्जाल: जोगिनुपर्ने माध्यम
सामाजिक सञ्जाल केवल सम्पर्कको माध्यम नभई अब ब्ल्याकमेलिङ र अपराधको नयाँ मोर्चा बन्न थालेको प्रस्ट हुन्छ । यस घटनाले मानिसहरूले सामाजिक सञ्जालमा अपरिचितसँग सम्बन्ध गाँस्नुअघि सतर्कता अपनाउनुपर्ने चेतावनी दिएको छ ।
-Recovered@1x_1-1792306880.jpg){kind=logo}
-Recovered@1x_1-1792308710.jpg){kind=logo}
