वीरगंज महानगरपालिकाले महानगरका ग्रामीण भेगमा स्वास्थ्य सेवा विस्तारलाई प्राथमिकता दिएको छ ।
ग्रामीण क्षेत्रका बिरामी र सेवाग्राहीको सहजतालाई ध्यानमा राख्दै स्वास्थ्य चौकीहरूको भौतिक संरचना स्तरोन्नती, सेवा विस्तार र जनशक्ति थप गर्दै आइरहेको छ । यसैक्रममा वडा नम्बर ३० लालपर्सास्थित स्वास्थ्य चौकीमा आइतबारदेखि गर्भवती महिलाका लागि २४ सै घण्टा सेवा दिने गरी बर्थिंग सेन्टर सञ्चालनमा ल्याइएको छ । वीरगंज महानगरपालिकाका मेयर राजेशमान सिंहले नवनिर्मित बर्थिंग सेन्टरको समुद्घाटन गरेका हुन् ।
महानगरपालिकाको जनस्वास्थ्य प्रवर्द्धन शाखाका प्रमुख राजु साहका अनुसार, लालपर्साको स्वास्थ्य चौकीकै भवनमा प्रसूती सेवा सञ्चालनमा आएपछि अब त्यहाँ २४ सै घण्टा प्रसूती सेवा उपलब्ध हुनेछ । बर्थिंग सेन्टर सञ्चालनका लागि तालिमप्राप्त दुई जना अनमीसहित आवश्यक जनशक्ति व्यवस्थापन गरिएको स्वास्थ्य चौकीका जनस्वास्थ्य निरीक्षक अनिशकान्त कुशवाहाले जानकारी दिए ।
कुशवाहाका अनुसार, लालपर्सा स्वास्थ्य चौकीमै दुई महिनादेखि जनस्वास्थ्य प्रयोगशालापनि सञ्चालनमा छ र त्यहाँ ३७ प्रकारका जाँच उपलब्ध छन् । यसअघि वीरगन्ज महानगरपालिका वडा नम्बर १८ भवानीपुर, वडा नम्बर २८ बगही र वडा नम्बर २१ लिपनीका स्वास्थ्य चौकीमा पनि बर्थिंग सेन्टर सञ्चालनमा आएको थियो ।
आइतबारको लालपर्सा बर्थिंग सेन्टर समुद्घाटन कार्यक्रममा वीरगंज महानगरपालिकाका प्रमुख प्रशासकीय अधिकृत अरबिन्दलाल कर्ण, वडा नम्बर ३० का वडाध्यक्ष मनोजकुमार यादव, स्वास्थ्य चौकीका इन्चार्ज मेवालाल ठाकुर लगायतको उपस्थिती थियो ।
