पञ्चायतकालदेखि राजाको सक्रिय शासनकालसम्म सत्ता राजनीतिमा केन्द्रमा रहेका नेता बद्रीप्रसाद मण्डलको मंगलबार ८८ वर्षको उमेरमा विराटनगरमा निधन भएको छ ।
२०६२/६३ सालको जनआन्दोलनपछि क्रमशः राजनीतिक मञ्चबाट ओझेलमा परेका मण्डलको विराटनगर महानगरपालिका–९ घोघापुल चोकस्थित निवासमा सुतेकै अवस्थामा निधन भएको परिवारले जनाएको छ ।
मण्डलकी भतिजी जस्मिन मण्डलका अनुसार सोमबार रातिसम्म उनको स्वास्थ्य अवस्था सामान्य थियो ।
“बिहान शौचालय गएर आफैं ओछ्यानमा फर्कनुभएको थियो। त्यसपछि सुतेकै अवस्थामा उहाँको निधन भयो,” जस्मिनले बताइन् ।
पञ्चायतदेखि बहुदलीय व्यवस्थासम्मको राजनीतिक यात्रा
दक्षिण–पूर्वी मोरङको जहदा गाउँपालिका–२ मझारे पुर्ख्यौली थातथलो भएका मण्डलले २०३६ सालदेखि पञ्चायती राजनीतिमा प्रवेश गरेका थिए । पञ्चायतकालमै सत्ता राजनीतिमा उदाएका उनी २०४६ सालपछि बहुदलीय संसदीय व्यवस्थामा पनि प्रभावशाली भूमिकामा रहे ।
मण्डल राष्ट्रिय पञ्चायतका सदस्य थिए। उनी २०४२ सालमा केही समय अर्थराज्यमन्त्री बनेका थिए भने पछि वनमन्त्रीको जिम्मेवारी पनि सम्हाले ।
निर्वाचन राजनीति
२०५१ सालको मध्यावधि निर्वाचनमा मण्डल मोरङबाट नेपाली कांग्रेसकी नेतृ शैलजा आचार्यसँग पराजित भएका थिए । तर २०५६ सालको निर्वाचनमा भने उनले आचार्यलाई पराजित गरेका थिए ।
सद्भावना पार्टी र राजाको सक्रिय शासनकाल
२०४६ सालको राजनीतिक परिवर्तनपछि मण्डल राजावादी धार त्यागेर नेपाल सद्भावना पार्टीमा सक्रिय बने । पार्टीका संस्थापक अध्यक्ष गजेन्द्रनारायण सिंहको निधनपछि केही समय कार्यवाहक अध्यक्षको जिम्मेवारी पनि सम्हाले ।
तत्कालीन राजा ज्ञानेन्द्र शाहको सक्रिय शासनकालमा मण्डल पुनः सत्तामा उक्लिए। ज्ञानेन्द्रको अध्यक्षतामा गठन गरिएको मन्त्रिपरिषद्मा उनी उपप्रधानमन्त्री थिए ।
राजनीतिबाट अलगाव र पारिवारिक विवरण
२४० वर्ष लामो राजतन्त्रको अन्त्यपछि मण्डल राजनीतिबाट क्रमशः टाढिँदै गए। पछिल्लो समय उनी घरमै गुमनाम जीवन बिताइरहेका थिए ।
मण्डलका परिवारमा दुई श्रीमती, तीन छोरा र तीन छोरी छन् । चार छोरामध्ये एक छोराको यसअघि नै निधन भइसकेको परिवारले जनाएको छ ।
उनको अन्त्येष्टि मोरङको जहदा–२ मझारेमा गरिएको छ ।
.jpg-2-1769587845.jpg)
