राष्ट्रिय स्वतन्त्र पार्टी (रास्वपा) का वरिष्ठ नेता बालेन शाह ले सुदूरपश्चिमलाई समृद्ध र आत्मनिर्भर बनाउने शक्ति आफ्नो पार्टीसँग मात्र रहेको दाबी गरेका छन् ।
रास्वपाको ‘परिवर्तन उद्घोष सभा’लाई सम्बोधन गर्दै उनले सुदूरपश्चिम विकास भए देशै विकास हुने बताएका हुन् । आर्थिक अभावका कारण शिक्षा र स्वास्थ्य सेवाबाट वञ्चित हुनुपरेको अवस्थाको अन्त्य गर्ने प्रतिबद्धता व्यक्त गर्दै उनले विपन्न र गरिब नागरिकले सहज रूपमा शिक्षा र स्वास्थ्य सेवा पाउनुपर्ने बताए। “खल्तीमा पैसा नभएको नागरिकले पनि शिक्षा र स्वास्थ्य पाउनुपर्छ,” उनले भने, “दुई वर्षमा बन्ने बाटो २० वर्षमा पनि बन्दैन, अब डेढ वर्षमै बन्नुपर्छ, त्यो नै हाम्रो एजेन्डा हो ।”
पूर्वाधार विकासमा ढिलासुस्ती सह्य नहुने उल्लेख गर्दै उनले सडक निर्माणलाई प्राथमिकतामा राख्ने बताए । रास्वपा सरकारमा गएपछि कांग्रेस, एमाले, माओवादीलगायत सबै दलका कार्यकर्ता तथा सर्वसाधारण हिँड्ने बाटो निर्माण गरिने उनको भनाइ थियो । नेपाललाई स्विट्जरल्याण्ड बनाउने चर्चा भइरहँदा सुदूरपश्चिममै प्राकृतिक तथा पर्यटकीय सम्भावनाको खानी रहेको उनले उल्लेख गरे । बडिमालिका, रामारोशन र खप्तड राष्ट्रिय निकुञ्ज जस्ता स्थलहरूको उदाहरण दिँदै उनले सुदूरपश्चिमको पहिचान राष्ट्रिय स्तरमा उजागर गर्नुपर्ने धारणा राखे ।
“हामीसँग भएका सम्भावनालाई देखाउन सकेका छैनौँ, सुदूरपश्चिमलाई राष्ट्रिय रूपमा जोड्न सकेका छैनौँ,” उनले भने । सुदूरपश्चिम र काठमाडौँबीच सांस्कृतिक तथा भावनात्मक एकता आवश्यक रहेको उल्लेख गर्दै उनले सुदूरपश्चिमको पहिचान राष्ट्रिय स्तरमा स्थापित हुनुपर्ने बताए ।
सभामा उनले रास्वपा भोट माग्न नभई काम माग्न आएको दाबी गरे । “राष्ट्रिय स्वतन्त्र पार्टी यहाँ भोट माग्न आएको होइन, काम माग्न आएको हो। कामको सूची दिनुस्, हामी गरेर देखाउँछौँ,” उनले भने ।
.jpg-2-1769587845.jpg)
