पूर्वप्रधानन्यायाधीश चोलेन्द्रशमशेर जबरा पक्राउ परेसँगै पछिल्लो समय उनले देखाएको न्यायिक सक्रियता र विभिन्न संवेदनशील मुद्दाका सरोकारवालासँग गरेको भनिएको भेटघाटबारे प्रश्न उठेको छ ।
जबरालाई आइतबार बिहान काठमाडौंस्थित निवासबाट उपत्यका अपराध अनुसन्धान कार्यालयको टोलीले पक्राउ गरेको पुष्टि भएको छ । तर, प्रहरीले उनलाई कुन अभियोगमा पक्राउ गरिएको हो भन्ने विषयमा हालसम्म औपचारिक जानकारी सार्वजनिक गरेको छैन ।
यसैबीच, स्रोतका अनुसार नेपाल दूरसञ्चार प्राधिकरणको बहुचर्चित टेरामक्स प्रकरण तथा वीरगंज महानगरपालिकाका मेयर राजेशमान सिंहसम्बन्धी मुद्दाको सुनुवाइ र फैसलाअघि जबराले सम्बन्धित सरोकारवालासँग भेटघाट गरेको विषय अनुसन्धानको चासोमा परेको छ । अख्तियार दुरुपयोग अनुसन्धान अायोगले दायर गरेको मुद्दाबाट वीरगंजका मेयर राजेशमान सिंहले सफाई पाईसकेका छन् ।
विशेषगरी टेरामक्स प्रकरणमा तत्कालीन प्रधानन्यायाधीश जबरा र न्यायाधीश कुमार चुडालको इजलासले २०७८ वैशाख १४ गते दूरसञ्चार प्राधिकरणको टेन्डरसम्बन्धी निर्णय बदर हुने गरी आदेश दिएको थियो । यही आदेशलाई आधार बनाएर टेरामक्स खरिद प्रक्रिया अघि बढेको विषय अहिले भ्रष्टाचार अनुसन्धान तथा मुद्दासँग समेत जोडिएको छ ।
टेरामक्स प्रकरणमा अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको थियो । उक्त प्रकरणमा जबराको तत्कालीन न्यायिक भूमिकासँगै पछि उनले देखाएको भनिएको सक्रियता र सम्बन्धित व्यक्तिहरूसँगको भेटघाटलाई समेत चासोका साथ हेरिएको स्रोतको दाबी छ ।
त्यस्तै, वीरगंज महानगरपालिकाका मेयर राजेशमान सिंहसम्बन्धी मुद्दाको सुनुवाइअघि पनि जबराले सरोकारवालासँग भेटघाट गरेको दाबी स्रोतहरूले गरेका छन् । यद्यपि, ती भेटघाटको प्रकृति, उद्देश्य र मुद्दाको न्यायिक प्रक्रियामा त्यसको कुनै प्रभाव परेको थियो वा थिएन भन्ने पुष्टि हुन बाँकी छ । अनलाइन खबरले जबराले वीरगंजका मेयर राजेशमान सिंहको मुद्दा भुमिका खेलेकाले सफाई पाएको स्रोतको दाबी सहितको समाचार लेखेको छ ।
पूर्वप्रधानन्यायाधीश जबरा यसअघि पनि न्यायिक आचरण र अदालत सञ्चालनसँग सम्बन्धित विवादमा परेका थिए । उनीविरुद्ध संघीय संसदमा महाअभियोग प्रस्तावसमेत दर्ता भएको थियो । पछिल्लो समय उनको महाअभियोगसम्बन्धी विवादमा संवैधानिक इजलासले समेत निर्णय गरिसकेको छ । जबरामाथि लागेको वास्तविक आरोप के हो, पक्राउको आधार के हो र टेरामक्स तथा राजेशमान सिंहसम्बन्धी मुद्दासँग जोडिएका भनिएका भेटघाटको प्रकृति कस्तो थियो भन्ने विषय अहिले खुलाईएको छैन् ।
पुर्व प्रधानन्यायाधीश दामोदर शर्माले सर्वोच्च अदालतको न्यायाधीशमा चोलेन्द्र शमशेर जबरालाई नियुक्ति गरेको थियोे भने हालका प्रधानन्यायाधीश मनोज कुमार शर्मालाई चोलेन्द्र शमशेर जबराले सर्वोच्च अदालतमा नियुक्त गरेका थिए ।
