पूर्वप्रधानमन्त्री एवम् केपी शर्मा ओली र पूर्वगृहमन्त्री रमेश लेखक पक्राउ परेपछि प्रहरीले आगामी कानुनी प्रक्रिया अघि बढाएको छ ।
पक्राउ परेका दुवै जनालाई आइतबार २४ घण्टाभित्र काठमाडौँ जिल्ला अदालतमा पेश गरिनेछ । उनीहरूलाई ‘हेलचेक्र्याइँ गरी ज्यान मारेको’ अभियोगमा पक्राउ पुर्जी जारी गरिएको छ, जसको थप अनुसन्धान गर्न अदालतबाट म्याद थप गर्नुपर्दछ ।
मुलुकी फौजदारी कार्यविधि संहिता, २०७४ अनुसार ज्यानसम्बन्धी कसुरमा अनुसन्धानका लागि प्रहरीले अदालतबाट अनुमति लिएर २५ दिनसम्म हिरासतमा राख्न सक्छ । सो अवधिभित्र अनुसन्धान प्रतिवेदन तयार गरी सरकारी वकिलको कार्यालयमार्फत अदालतमा मुद्दा दर्ता गरिसक्नुपर्छ ।
पूर्वन्यायाधीश गौरीबहादुर कार्की नेतृत्वको जाँचबुझ आयोगले ओली र लेखकको क्रियाकलापमा ‘लापरबाहीले ज्यान मार्ने’ घटना भएको ठहर गरेको थियो । आयोगले फौजदारी कानुन अनुसार संगठित अपराधका पक्षहरू पनि अनुसन्धान गर्न सकिने सिफारिस गरेको थियो ।
अदालतमा पेश भएपछि प्रहरीले दुवै जनालाई हिरासतमा राख्न म्याद थपका लागि अनुमति माग्नेछ । अदालतले अनुमति दिएमा अनुसन्धान जारी रहनेछ, नदिएमा भने उनीहरू छुट्न सक्छन्, तर अनुसन्धान भने रोकिँदैन ।
प्रहरीले कार्की आयोगको प्रतिवेदन, मन्त्रिपरिषद्को कार्यान्वयन निर्णय, गृह मन्त्रालयबाट प्राप्त किटानी जाहेरी, मृतकको पोस्टमार्टम रिपोर्ट, घटनास्थल मुचुल्का र सीसीटीभी फुटेज लगायतका विभिन्न प्रमाणहरूलाई आधार बनाउँदै घटनाका मुख्य दाेषिकाे रूपमा अनुसन्धान अघि बढाउन सक्छ ।
कार्की आयोगले मुलुकी अपराध संहिता, २०७४ को दफा १८१ (लापरबाहीपूर्ण काम गरी ज्यान मार्ने) र दफा १८२ (हेलचेक्र्याइँ गरी ज्यान मार्ने) अनुसार अनुसन्धान गर्न सिफारिस गरेको थियो ।
यस दफा १८१ अनुसार ३ देखी १० वर्षसम्म कैद र ३० हजारदेखी एक लाख रुपैयाँसम्म जरिवाना र दफा १८२ अनुसार ३ वर्षसम्म कैद र ३० हजार रुपैयाँसम्म जरिवाना ताेकिएकाे छ ।
आयोगले जेनजी आन्दोलनका क्रममा मृत्यु भएका घटनामा तत्कालीन प्रधानमन्त्री केपी शर्मा ओली, तत्कालीन गृहमन्त्री रमेश लेखक र तत्कालीन नेपाल प्रहरी महानिरीक्षक चन्द्रकुवेर खापुङ विरुद्ध अनुसन्धान गर्न सिफारिस गरेको थियो । यसका साथै, तत्कालीन गृहसचिव गोकर्णमणि दुवाडी, सशस्त्र प्रहरी महानिरीक्षक राजु अर्याल, राष्ट्रिय अनुसन्धान विभागका तत्कालीन प्रमुख हुतराज थापा र काठमाडौँका तत्कालीन सीडीओ छविलाल रिजाल विरुद्ध हेलचेक्र्याइँअन्तर्गत अनुसन्धान गर्न सिफारिस गरिएको थियो ।
शुक्रबार बसेको मन्त्रिपरिषद् बैठकले कार्की आयोगको प्रतिवेदन कार्यान्वयन गर्ने क्रममा सुरक्षाकर्मीसँग सम्बन्धित सिफारिसका विषयमा अध्ययन गर्न कार्यदल गठन गर्ने र बाँकीको तत्काल कार्यान्वयन गर्ने निर्णय गरेको थियो ।
यस निर्णयपछि शनिबार बिहान प्रहरीले जरुरी पक्राउ पुर्जी जारी गर्दै ओली र लेखकलाई हिरासतमा राखेर अनुसन्धान प्रक्रिया सुरु गरेको हो ।
यता जेनजी मुभमेन्ट नेपालले एमाले अध्यक्ष एवम् पूर्वप्रधानमन्त्री केपी शर्मा ओली र पूर्व गृहमन्त्री रमेश लेखकलाई गिरफ्तार गरी कारबाही प्रक्रिया अगाडि बढाउने सरकारको निर्णयको स्वागत गरेको छ । शनिबार उक्त सङ्गठनले एक विज्ञप्ति जारी गर्दै उक्त निर्णयको स्वागत गरेको हो ।
अर्काे तर्फ एमालेकाे २८ वटै संगठनले विराेध गर्ने कार्यक्रम अनुसार विभिन्न स्थानमा विराेधका कार्यक्रम गरिरहेकाे छ ।
