पर्सा जिल्लामा माध्यमिक शिक्षा परीक्षा (एसईई) अन्तर्गतका सबै विषयका उत्तरपुस्तिका (कपी) जाँच कार्य सम्पन्न भएको छ ।
जिल्लाभरका परीक्षा उत्तरपुस्तिका जाँच गरी राष्ट्रिय परीक्षा बोर्डमा पठाइसकिएको शिक्षा विकास तथा समन्वय इकाई कार्यालय पर्साले जनाएको छ ।इकाई कार्यालयका अनुसार यस वर्ष उत्तरपुस्तिका जाँच कार्य व्यवस्थित रूपमा तीन चरणमा सम्पन्न गरी केन्द्रमा पठाइएको हो ।
पहिलो चरणमा अनिवार्य अंग्रेजी र नेपाली विषयका कपीहरू जाँच गरी पठाइएको थियो । त्यसपछि दोस्रो चरणमा ऐच्छिक बाहेकका अन्य विषयका उत्तरपुस्तिकाहरू पठाइएको र अन्तिम चरणमा बाँकी रहेका सबै विषयका कपीहरू समेत जाँच गरी बोर्डमा बुझाइएको इकाई प्रमुख मोती प्रसाद भट्टराईले जानकारी दिए ।
उनका अनुसार यस वर्षको उत्तरपुस्तिका जाँच प्रक्रिया समयमै सम्पन्न गरी पारदर्शी ढंगले राष्ट्रिय परीक्षा बोर्डमा पठाइएको छ । “सबै विषयका कपीहरू जाँच गरी निर्धारित समयमै बोर्डमा पठाइसकेका छौँ,” उनले भने ।
यस वर्ष पर्साबाट करिब ६० प्रतिशतको आसपासमा नतिजा आउने अनुमान गरिएको शिक्षा विकास तथा समन्वय इकाई कार्यालय स्रोतले जनाएको छ। यद्यपि अन्तिम नतिजा भने राष्ट्रिय परीक्षा बोर्डले प्रकाशित गरेपछि मात्र यकिन हुनेछ ।
इकाई कार्यालयका अनुसार उत्तरपुस्तिका समयमै जाँच सम्पन्न भएकाले यस वर्ष एसईईको नतिजा निर्धारित समयमै सार्वजनिक हुने अपेक्षा गरिएको छ । राष्ट्रिय परीक्षा बोर्डले आगामी वैशाख २९ गतेभित्र नतिजा सार्वजनिक गर्ने तयारी गरिरहेको बताइएको छ ।
पर्सा जिल्लामा यस वर्ष एसईई परीक्षा शान्तिपूर्ण रूपमा सम्पन्न भएको र परीक्षा व्यवस्थापन तथा मूल्यांकन प्रक्रिया पनि व्यवस्थित देखिएको सम्बन्धित अधिकारीहरूले बताएका छन् ।
