वैशाख महिनाको सुरुदेखि भारतबाट सय रुपैयाँभन्दा बढी मूल्यका सामान ल्याउँदा अनिवार्य भन्सार महसुल तिर्नुपर्ने नियम कडाइका साथ लागू गरिएपछि सीमावर्ती नेपाली बजारमा व्यापार व्यवसाय बढ्न थालेको छ ।
नाकामा गरिएको कडाइका कारण खरिदका लागि सीमापारी जाने नेपाली उपभोक्ताको संख्या उल्लेख्य रूपमा घटेको छ । यससँगै भारतको रुपैडिहा बजार सुनसान बन्दै गएको छ भने नेपालगन्ज बजारमा चहलपहल बढ्न थालेको छ । नेपालगन्ज उद्योग वाणिज्य संघका अध्यक्ष टंक धामीका अनुसार वैशाख २ गतेदेखि उक्त नियम कडाइका साथ लागू गरिएपछि सीमाक्षेत्रको व्यापारिक गतिविधिमा ठूलो परिवर्तन आएको छ । उनले कडाइपछि स्थानीय बजारमा व्यापार वृद्धि भएको र सीमापारीको व्यापार घटेको बताए ।
यसअघि बाँके मात्र नभई दाङ, बर्दिया र सुर्खेतसम्मका उपभोक्ता दैनिक उपभोग्य वस्तु खरिदका लागि रुपैडिहा जाने गरेका थिए । तर अहिले सो क्रम घटेर नेपाली बजारमै खरिद बढेको संघका पूर्व अध्यक्ष अब्दुल वाहीद मन्सुरीले बताए । स्थानीय व्यवसायीहरूका अनुसार पछिल्लो समय ग्राहकको आगमन बढेको छ । नेपालगन्ज उपमहानगरपालिका–३ का कपडा व्यवसायी केदार गुप्ताले नाकामा कडाइपछि व्यापारमा सुधार आएको बताए। त्रिभुवन चोकका किराना व्यवसायी अशोक गुप्ताका अनुसार पनि उपभोक्ताले नेपाली बजार रोज्न थालेका छन् ।
यता सीमापारीको रुपैडिहा बजारमा भने व्यापार घट्दै गएको भारतीय व्यवसायीहरूले बताएका छन्। नेपाली ग्राहक नआएपछि बिक्री आधाभन्दा बढी घटेको उनीहरूको भनाइ छ ।
भन्सार कडाइले राजस्व वृद्धि
नेपाल–भारत सीमास्थित जमुनाहा नाकामा भन्सार कडाइ गरिएपछि राजस्व संकलनमा समेत वृद्धि भएको छ । नेपालगन्ज भन्सार कार्यालयका प्रमुख जनार्दन पौडेलका अनुसार वैशाख २ गतेअघि दैनिक करिब २ लाख ५० हजार रुपैयाँ राजस्व उठ्ने गरेकोमा अहिले दैनिक ३ लाखदेखि ३ लाख ७५ हजार रुपैयाँसम्म संकलन हुन थालेको छ ।
तस्करी नियन्त्रण गर्न माग भन्सार कडाइपछि वैध व्यापार बढे पनि अवैध तस्करी बढ्न सक्ने चिन्ता स्थानीयले व्यक्त गरेका छन् । नागरिक अगुवा हेमन्तराज काफ्लेले कडाइसँगै अवैध आयात र क्यारिङ पूर्ण रूपमा रोक्नुपर्ने बताए । नेपालगन्ज उद्योग वाणिज्य संघका पूर्व अध्यक्ष कृष्णप्रसाद श्रेष्ठले पनि खुला सीमाका कारण हुने तस्करी नियन्त्रण गर्न सरकारलाई आग्रह गरेका छन् ।
बाँकेका प्रमुख जिल्ला अधिकारी दिलकुमार तामाङले अवैध आयात र तस्करी नियन्त्रणका लागि कडाइ गरिएको जानकारी दिँदै दैनिक रूपमा अवैध सामान बरामद भइरहेको बताए । साथै बजार अनुगमनलाई समेत प्रभावकारी बनाइने उनले बताए ।
