थापागाउँस्थित एक थिएटरमा मञ्चन भइरहेको नाटक ‘लुसिफर राइजिङ’ आइतबार एकाएक रोकिएको छ । नाटक निर्माण संस्था ‘मझुवा बगर’ले राजनीतिक दबाब र धम्कीका कारण नाटक रोक्न बाध्य भएको जनाएको छ ।
संस्थाले जारी गरेको सूचनामा ‘अज्ञात राजनीतिक व्यक्ति, प्रवृत्ति र समूहको दबाबका कारण नाटकको शो रोक्न बाध्य भएको’ उल्लेख गर्दै दर्शकमा पर्न गएको असुविधाप्रति क्षमाप्रार्थी रहेको जनाएको छ । नाटक ‘एक थिएटर नेपाल’को हल भाडामा लिएर मञ्चन भइरहेको थियो ।
नाटक रोकिएको विषयमा स्पष्ट कारण सार्वजनिक नभए पनि ‘लुसिफर’ शब्दलाई लिएर केही व्यक्तिबाट असन्तुष्टि र धम्कीपूर्ण फोन आएको आशंका गरिएको छ । पछिल्लो समय यो शब्दलाई राजनीतिक सन्दर्भमा समेत प्रयोग गरिँदै आएको भन्दै सामाजिक सञ्जालमा विभिन्न अड्कलबाजी भइरहेको छ ।
नाट्यकर्मी अनुप बरालले घटनाप्रति गम्भीर ध्यानाकर्षण भएको जनाउँदै कला–संस्कृतिमाथि दबाब र अंकुश स्वीकार्य नहुने प्रतिक्रिया दिएका छन्। उनले कला अभिव्यक्तिको माध्यम भएको र राज्यले प्रश्नसँग डराउन थाले लोकतान्त्रिक मूल्य कमजोर हुने टिप्पणी गरेका छन् । उनको भनाइलाई नाट्यकर्मी दिया मास्केले पनि सामाजिक सञ्जालमा साझा गरेकी छन् ।
त्यस्तै, अर्का नाट्यकर्मी राज शाहले कुनै पनि दबाब, धम्की वा प्रभावमा नेपाली रङ्गमञ्च नझुक्ने बताएका छन् । उनले विगतको पञ्चायतकालमा जस्तै नाटक रोक्नुपर्ने अवस्था फेरि दोहोरिनु चिन्ताजनक भएको टिप्पणी गरेका छन् ।
‘एक थिएटर नेपाल’का सञ्चालक सौजन सेनेहाङका अनुसार नाटकका निर्देशक सहलेसलाई आइतबार बिहान अज्ञात नम्बरबाट धम्कीपूर्ण फोन आएको थियो । त्यसपछि कलाकारहरूसँग छलफल गरी नाटक रोक्ने निर्णय गरिएको उनले बताए। धम्की सरकारी पक्षबाट आएको हो वा अन्य समूहबाट भन्ने स्पष्ट नभएको उनले जानकारी दिए ।
नाटक जेठ १ गतेदेखि मञ्चन भइरहेको थियो र जेठ २० गतेसम्म प्रदर्शन गर्ने तय गरिएको थियो । ‘लुसिफर राइजिङ’ नाटक शक्तिशाली व्यक्तिहरूको क्रियाकलाप, सामाजिक अन्तरद्वन्द्व र सुकुमबासी बस्तीमा घट्ने घटनालाई आधार बनाएर तयार गरिएको थियो । सहलेसद्वारा लिखित तथा निर्देशित उक्त नाटकमा विभिन्न कलाकारहरूले अभिनय गरेका थिए ।
हाल घटनाबारे थप स्पष्टता आउन बाँकी छ भने नाट्यकर्मीहरू र कला क्षेत्रले अभिव्यक्ति स्वतन्त्रतामाथि प्रश्न उठेको भन्दै असन्तुष्टि जनाइरहेका छन् ।
