चालु आर्थिक वर्षको पहिलो १० महिनामा नेपालबाट रु ८८ अर्ब २२ करोड बराबरका वस्तु तथा सामान निर्यात भएका छन् ।
गत आर्थिक वर्षको सोही अवधिमा रु ८३ अर्ब २५ करोड बराबरका वस्तु तथा सेवा निर्यात भएको वीरगंज भन्सार कार्यालयले जनाएको छ । वीरगंज भन्सार कार्यालयका सूचना अधिकारी उदयसिंह विष्टका अनुसार यस अवधिमा मुख्य रूपमा भटमासको प्रशोधित तेल, सूर्यमुखी तेल, फलफूलको रस, कपडा तथा सिन्थेटिक यार्न निर्यात भएका छन् ।
आंकडा अनुसार चालु आवको १० महिनामा रु ४८ अर्ब ११ करोड बराबरको भटमासको प्रशोधित तेल, रु ५ अर्ब ३५ करोडको सूर्यमुखी तेल तथा रु ६ अर्ब ४२ करोड बराबरको फलफूलको रस निर्यात भएको छ । त्यसैगरी रु ३ अर्ब ३ करोड बराबरको कपडा र रु २ अर्ब २५ करोड बराबरको ‘सिन्थेटिक यार्न’ पनि निर्यात भएको छ ।
वीरगंज भन्सारका अनुसार निर्यातमा प्रमुख योगदान प्रशोधित खाद्य तेलको रहेको देखिएको छ ।
