जनकपुरधाम । गहुँ उत्पादनका लागि उर्वर र अग्रणी मानिएको मधेस प्रदेशमा यस वर्ष गहुँ उत्पादनमा उल्लेखनीय कमी आएको छ । प्रतिकूल मौसम, रोग–कीराको प्रकोप, सिँचाइको अभाव तथा गुणस्तरीय बीउबिजनको कमीका कारण उत्पादनमा गिरावट आएको हो ।
मधेस प्रदेश कृषि निर्देशनालय, नक्टाझिज धनुषाका अनुसार यस वर्ष प्रदेशभर तीन लाख ७३२ हेक्टर क्षेत्रफलमा गहुँ खेती गरिएकोमा प्रतिहेक्टर १.८ मेट्रिक टनका दरले कुल पाँच लाख ४३ हजार १६० मेट्रिक टन गहुँ उत्पादन भएको छ । यो अघिल्लो वर्षको तुलनामा उल्लेखनीय रूपमा कम हो ।
अघिल्लो वर्ष मधेस प्रदेशमा एक लाख ७८ हजार ४३३ हेक्टर क्षेत्रफलमा प्रतिहेक्टर ३.३७ मेट्रिक टनका दरले सात लाख ३१ हजार मेट्रिक टन गहुँ उत्पादन भएको थियो ।
यस वर्ष जिल्लागत रूपमा सबैभन्दा बढी उत्पादन धनुषामा भएको छ । धनुषामा ३३ हजार ५०० हेक्टर क्षेत्रफलमा प्रतिहेक्टर २.९४ मेट्रिक टनका दरले ९८ हजार ४९० मेट्रिक टन गहुँ उत्पादन भएको बागबानी विकास अधिकृत किरण विश्वकर्माले जानकारी दिए ।
त्यसैगरी महोत्तरीमा २७ हजार हेक्टरमा प्रतिहेक्टर २.६ मेट्रिक टनका दरले ७२ हजार ८०० मेट्रिक टन, सप्तरीमा २९ हजार ४०० हेक्टरमा प्रतिहेक्टर २.८ मेट्रिक टनका दरले ८२ हजार ३२० मेट्रिक टन र बारामा २९ हजार हेक्टरमा प्रतिहेक्टर २.४८ मेट्रिक टनका दरले ७१ हजार ९२० मेट्रिक टन गहुँ उत्पादन भएको छ ।
त्यस्तै सर्लाहीमा २७ हजार ४०० हेक्टरमा प्रतिहेक्टर २.५४ मेट्रिक टनका दरले ६९ हजार ५९६ मेट्रिक टन, पर्सामा २३ हजार २० हेक्टरमा प्रतिहेक्टर २.६ मेट्रिक टनका दरले ५९ हजार ८५२ मेट्रिक टन तथा रौतहटमा १७ हजार २९२ हेक्टरमा प्रतिहेक्टर ३.०५ मेट्रिक टनका दरले ५२ हजार ७४१ मेट्रिक टन गहुँ उत्पादन भएको छ ।
प्रदेशमा सबैभन्दा कम उत्पादन सिरहामा भएको छ। सिरहामा १४ हजार १७६.४८ हेक्टर क्षेत्रमा प्रतिहेक्टर २.५१ मेट्रिक टनका दरले ३५ हजार ४४१ मेट्रिक टन गहुँ उत्पादन भएको छ ।
कृषि निर्देशनालयका अनुसार समयमा सिँचाइको व्यवस्था हुन नसक्नु, उन्नत बीउको अभाव र प्रतिकूल मौसमका कारण किसानले अपेक्षित उत्पादन लिन नसकेको हो ।
