राष्ट्रिय वाणिज्य बैंक जलेश्वर शाखाका कर्मचारी र धितो मूल्यांकनकर्ताको मिलेमतोमा सरकारी कागजात कीर्ते गरी ६० लाख रुपैयाँ ऋण प्रवाह भएको खुलेको छ ।
फर्जी लालपुर्जा, फर्जी रोक्का र फर्जी लिखतका आधारमा उक्त बैंकबाट लोहारपट्टी नगरपालिका– ४ का श्रीनारायण साहको नाममा २०८३ जेठ १ गते ६० लाख रुपैयाँ ऋण प्रवाह भएको हो । बैंक जलेश्वरका शाखा प्रबन्धक प्रदिप कुमार झाले फर्जी कागजातकै आधारमा ६० लाख रुपैयाँ ऋण प्रवाह भएको स्विकारेका छन् । साहले पेश गरेका कागजहरु किर्ते भएको स्थानीयले बैंकलाई जानकारी गराएपछि बैंकले उक्त कागजपत्रहरुलाई रुजु गर्नका लागि भूमि प्रशासन कार्यालय जलेश्वरमा पत्र पठाएको थियो ।
साहले बैंककै सरकारीकर्मचारीको मिलेमतोमा छाप र कर्मचारीको हस्ताक्षरसमेत किर्ते गरेको पाइएको छ । उनीहरुले धितोको लालपुर्जा नै नक्कली भएको मालपोतबाट रोक्कालगायत कागजपत्रसमेत नक्कली बनाइएको किर्ते गरेको खुलासा भएको छ । ऋण्ी साहले बैंकमा पेश गरेको सक्कली जग्गाको बजार मूल्य १६ लाख ५० हजार मात्रै भएको तथ्यसमेत खुलेको छ । राष्ट्रिय वाणिज्य बैंक जलेश्वर शाखामा नक्कली र किर्ते कागजपत्रहरूका आधारमा ऋण लगानी गरेको तथ्य सार्वजनिक भएपछि राष्ट्रिय वाणिज्य बैंकको केन्द्रीय कार्यालय काठमाण्डुको कानुन शाखाले आन्तरिक छानबिन शुरु गरेको छ । बैंकका शाखा प्रबन्धक झा र कर्जा शाखाका प्रमुख राकेश यादवलाई धितो मूल्यांकनकर्ता योगेन्द्र यादव र कर्जा प्रवाहमा संलग्न कर्मचारीमाथि छानबिन भइरहेको छ ।
प्रबन्धक झालगायतका कर्मचारीसमेतको मिलेमतोमा यस्तो काम भएको भन्दै उनीहरुलाई हालसम्म प्रहरीले पक्राउ गरेको छैन । बलवा नगरपालिका– ३ का रामकरण साह कानुबाट २०८३ बैशाख २८ मा लोहारपट्टी नगरपालिका– ४ का श्रीनारायण साहले बलवा– १ को कित्ता नम्बर ७०९ को १३ धुर जग्गा खरिद गरेका थिए । श्रीनारायण साहले जग्गा को नक्कली धनीपुर्जामा २०८० पुस २० गते मिति परिवर्तन गरी र किर्ते कागजपत्रहरूका आधारमा राष्ट्रिय वाणिज्य बैंक जलेश्वर शाखाबाट ६० लाख रूपैयाँ कर्जा लिएका हुन् । राष्ट्रिय वाणिज्य बैंक जलेश्वरले जग्गा रोक्काका लागि २०८३ वैशाख ३० गते भूमि प्रशासन कार्यालय जलेश्वरमा पत्र पठाएको देखिन्छ ।
बैंकले २०८३ जेठ १ गते ऋण स्वीकृत गरेको देखिन्छ । प्रारम्भमा बैंकले यो प्रकरणलाई लुकाउन खोजेको थियो । हालसम्म उसले प्रहरीमा जाहेरीसमेत दिएको छैन । आफ्ना धेरै कर्मचारी अनुसन्धानमा तानिने भएपछि बैंकले उजुरी नदिएको स्रोत बताउँछ । त्यति ठूलो रकम कर्जा प्रवाह गर्दा आधारभूत प्रक्रियासमेत पूरा नगरेको देखिए पनि त्यसमा संलग्न कर्मचारीले उन्मुक्ति पाउने सम्भावना देखिएको छ । यसमा बैंकको विभिन्न तहबाट गम्भीर लापरबाही र मिलेमतो भएको खुले पनि बैंकले त्यसतर्फ अनुसन्धान गरेको छैन ।
बैंकका शाखा प्रबन्धक झाले कर्जा प्रवाह गर्ने कार्यमा संलग्नलाई कारबाही र अनुसन्धानका लागि राष्ट्रिय वाणिज्य बैंकको केन्द्रीय कार्यालय काठमाण्डुको कानुन शाखामा पत्राचार गरिसकेको बताए । ऋणी श्रीनारायण साहको थप जग्गा रोक्का गरिसकेको र यस कार्यमा भूमि प्रशासन कार्यालय जलेश्वरका कर्मचारी नै दोषी देखिएकाले अनुसन्धानका लागि जिल्ला प्रहरी कार्यालयलाई पत्राचार गरिने उनले बताए । बैंकका कर्मचारी र केही व्यक्ति मिलेर फर्जी कागजात तयार पारी आफू र आफू आबद्ध बैंकलाई झुक्याएको उनको दाबी छ ।
‘बैंकका कर्मचारी र केही व्यक्ति मिलेर योजनाबद्ध रूपमा फर्जी कागजात बनाइ मलाई झुक्याएर ६० लाख ऋण निकालेका छन्’ उनले भने, यसमा मेरो संलग्नता छैन भए कारबाही भोग्न तयार छु। तर भूमि प्रशासन कार्यालय जलेश्वरका प्रमुख दीपेन्द्र कुमार झाले सरकारी छाप र कर्मचारीको हस्ताक्षरसमेत किर्ते गरी नक्कली जग्गाधनी प्रमाण पत्रको आधारमा कर्जा प्रवाह गर्नै कार्यमा बैंककै कर्मचारी संलग्न रहेको आरोप लगाउँदै निष्पक्ष छानबिनको माग गरेका छन् । बाहिरै फाइल बनाइ भूमि प्रशासन कार्यालयको छाप र दस्तखतसमेत किर्ते गरेको विषय सार्वजनिक भएपछि महोतरी प्रशासनले चासो लिएको छ ।
यस प्रकरणमा भुमि प्रशासन कार्यालयको छाप र दस्तखत किर्ते गरिएकाले आवश्यक कारबाहीका लागि प्रमुख जिल्ला अधिकारीलाई आग्रह गरिएको महोतरी भूमि प्रशासन कार्यालयका प्रमुख झाले जनाएका छन् । सरकारी छाप दस्तखत गरी किर्ते कार्य गरिएको जानकारी भूमि प्रशासन कार्यालयका प्रमुखबाट आएको र उक्त काममा संलग्नहरूलाई कारबाहीको दायरामा ल्याइने जिल्ला प्रशासन कार्यालय महोतरीले जनाएको छ । बैंकले ऋण दिँदा जग्गा रोक्काका लागि बैंक कर्मचारी नै जाने गरेका छन् । साथै रोक्का अगाडि बैंकले नै खटाएको व्यक्ति मूल्यांकन गर्नसमेत जाने गरेका छन् ।
शाखा प्रबन्धकले पनि कागजात अध्ययन गरेपछि मात्र ऋण दिने व्यवस्था छ । तर कर्मचारी र प्रबन्धक समेतको मिलोमतोमा अवैध रुपमा ६० लाख रुपैयाँ ऋण प्रवाह भएको छ ।
